پکتیا کې د ځوان سالم شخصیت او فکري روزنې تر سرلیک لاندې سمینار وړاندې شو

د اطلاعاتو او کلتور وزارت د ځوانانو چارو معین قاري محمد یونس راشد د پکتیا پوهنتون په تالار کې د (ځوان سالم شخصیت، په اسلامي نظام کې يې د خدمت اهمیت او فکري روزنې) تر سرلیک لاندې علمي او فکري سمینار وړاندې کړ.
په دغه سمینار کې د ځوانانو چارو معين قاري محمد یونس راشد ځوانانو ته په خطاب کې وویل: ځوانان د افغانستان راتلونکی دی، که غواړي چې نړۍ سره سیال شي، خپل ملت د نورو له احتیاج څخه خلاص کړي او اسلامي نظام وساتي، نو باید خپل شخصیت د اسلامي شریعت مطابق جوړ کړي او د هېواد پرمختګ لپاره په پوره هڅې او قوي هوډ سره کار وکړي.
نوموړي زیاته کړه؛ اسلامي امارت د ځوانانو لپاره د بېلابېلو پروګرامونو د ترسره کولو لپاره ژمن دی او د دوی ستونزو ته رسېدنه کوي، خو ځوانان باید د خپل ولس د هوساینې او پرمختګ لپاره خپله دنده ترسره کړي.
د پکتیا د اطلاعاتو او کلتور رئيس مولوي ثواب جان اسلام یار وویل: دا ډول پروګرامونه د ځوانانو د فکري روزنې لپاره ډېر ګټور دي، نوموړي ډاډ څرګند کړ، چې د اطلاعاتو او کلتور ریاست تل د ځوانانو لپاره د ګټورو پروګرامونو په جوړولو بوخت دی.
د اسلام یار په وينا؛ ځوانان د هېواد د اشغال پرمهال د مبارزې لومړۍ کرښه کې ولاړ وو، د اطلاعاتو او کلتور وزارت ژمن دی، چې د دوی د روزنې او پرمختګ لپاره کار وکړي.
د سمینار په وروستیو کې ځوانانو او زده کړیالانو د ځوانانو چارو معین ته خپلې پوښتنې وړاندې کړې، چې په ډاډمنه توګه ځوابونه ورکړل شول.

۱۴۴۶/۵/۲۶ هـ ق
۱۴۰۳/۹/۸ هـ ل