په هرات کې د تجلی آیات په نوم ځانګړی رمضاني نندارتون جوړ شو
په هرات ولايت کې د اطلاعاتو او کلتور ریاست په همکارۍ د خطاطانو او خوش نویسانو د ټولنې له لوري د علامه سلجوقي په تالار کې د تجلی آیات په نوم څلور ورځنی نندارتون د روژې مبارکې میاشتې په مناسبت جوړ شو.
د کلتور او هنر آمر وویل: د اطلاعاتو او کلتور ریاست هڅه کوي، چې د داخلي نندارتونونو په جوړولو او بهرنیو نندارتونونو ته د هنرمندانو د ګډون زمینې برابرولو سره، د دوی د هنري آثارو د ودې او پلور ملاتړ وکړي.
همدا راز د خطاطانو ټولنې مسؤلین وايي: په دې نندارتون کې ۸۰ هنري آثار چې د نستعلیق، شکسته، چلیپا او ثلث خطونو په کارولو سره خطاطي او نقاشي شوي، نندارې ته وړاندې شوي دي.
د دې ټولنې رئیس عبدالجلیل توانا وویل: د نندارتون د جوړولو موخه د خطاطۍ بېلابېلو ډولونو معرفي کول او د دې هنر ژوندی ساتل دي.
هنرمندان د نندارتون له جوړېدو هرکلی کوي او له مسؤلینو غواړي، چې د دوی د آثارو د پلور او کورنيو او بهرنیو نندارتونونو کې د ګډون زمینه ورته برابره کړي.
د یادونې وړ ده، چې تجلی آیات نندارتون هر کال د روژې مبارکې میاشت کې د اطلاعاتو او کلتور ریاست په همکارۍ جوړېږي او مسؤلین د اصیلو هنري ارزښتونو د ساتنې او پراخېدو لپاره د ورته پروګرامونو پر دوام ټينګار کوي.
۱۴۴۶/۹/۲۳ ق
۱۴۰۴/۱/۳ ل
