په دولتي ادارو کې د عامه پوهاوي څانګې فعالېږي
د اطلاعاتو او فرهنګ وزارت د خپرونو چارو معين وايي چې اطلاعاتو ته د خبريالانو د آسانه او پر وخت لاسرسي په موخه ټاکل شوې، چې په دولتي ادارو کې د اطلاعاتو او عامه پوهاوي څانګې فعالې شي.
د اطلاعاتو او فرهنګ وزارت د خپرونو چارو معين مهاجر فراهي په هرات کې په يوه خبري ناسته کې وویل: اطلاعاتو او فرهنګ وزارت په پام کې لري چې په حکومتي بنسټونو کې د عامه پوهاوي څانګې د فعالولو ترڅنګ د ډله ييزو رسنيو په قانون او اطلاعاتو ته د لاسرسي په قانون هم بيا کتنه وکړي.
حیات الله مهاجر فراهي د يو شمېر رسنيو د مالي ستونزو په يادونې سره څرګنده کړه چې په هېواد کې زياتره رسنۍ د مالي ستونزو په ګډون له بېلابېلو ستونزو سره لاس او ګريوان دي او د دغو ستونزو د لرې کولو لپاره هلې ځلي کوي.
په همدي حال کې د هرات د اطلاعاتو او فرهنګ رييس مولانا نعيم الحق حقاني وايي چې اطلاعاتو ته لاسرسى د ټولو هېواد والو او د خبريالانو حق دى او بايد هڅې وشي چې په ټولو ادارو کې داسې کسان وګومارل شي چې خبريالانو ته ځواب ورکوونکي وي.
د يادونې وړ ده چې په هرات کې څه ناڅه دېرش رسنۍ فعالې دي او اوس نږدي ٢٥٠ خبريالان په دغه ولايت کې له سيمه ييزو، ملي او نړيوالو رسنيو سره کار کوي.
