په تخار کې د هنري اثارو، کورنیو تولیداتو او لاسي صنایعو نندارتون جوړ شو

د تخار ولايت د اطلاعاتو او کلتور رياست له خوا د اطلاعاتو او کلتور وزارت د هنر او کلتور د معين مولوي عتيق الله عزيزي او د تخار د والي مولوي عبيدالله امين زاده په شتون کې د هنري آثارو او لاسي صنايعو نندارتون د تخار په قصر کې پرانيستل شو. 
په پيل کې د تخار ولايت د اطلاعاتو او کلتور رئيس مولوي ذبيح الله انصاري د هنر او کلترو معين او ګډونوالو ته د ښه راغلاست ويلو ترڅنګ، هنري آثار، لاسي صنايع او کورني توليدات د هېواد وياړ وبلل.
د اطلاعاتو او کلتور وزارت د هنر او کلتور معين مولوي عتيق الله عزيزي د تخار ولايت د اطلاعاتو او کلتور رياست له لوري د هنرمندانو او توليدوونکو د توليداتو او لاسي صنايعو د نندارتون د جوړولو له کوربتوب څخه مننه وکړه او ويې ويل: د کورنیو تولیداتو او لاسي صنایعو په ملاتړ، موږ کولای شو د لویدیځ له احتياج څخه خلاص شو، هغه زیاته کړه؛ د لاسي صنایعو محلي تولیدونکي باید خپلو هنري کارونو ته دوام ورکړي، د اسلامي امارت دنده ده، چې د دوی ملاتړ وکړي. د اطلاعاتو او کلتور وزارت به د کورنیو تولیداتو، لاسي صنایعو او د هنرمندانو د هنري کارونو ملاتړ وکړي.
د نندارتون ګډونوالو د دغه نندارتون په جوړولو خوښي وښوده او د تخار ولایت د اطلاعاتو او کلتور له ریاست څخه یې مننه وکړه، چې د دوی د صنعتي کارونو ملاتړ او هڅونه یې وکړه.

۱۴۴۶/۴/۳۰ هـ ق
۱۴۰۳/۸/۱۲ هـ ل