هلمند کې مياشتنۍ مشاعره ترسره شوه

چهارشنبه( ۷ د ذوالقعدې ۱۴۴۵) د هلمند ولايت اطلاعاتو او فرهنګ ریاست میاشتنۍ مشاعره د یاد ریاست د غونډو په تالار کي ترسره شوه.

  یاده مشاعره کي د اطلاعاتو او فرهنګ رياست د مسؤلينو تر څنګ د مرکز لښکرګاه او يو شمېر ولسوالیو څخه راغلو شاعرانو، ترنم ويونکو او لیکوالانو ګډون کړی وو.

د اطلاعاتو او فرهنګ رياست د اطلاعاتو آمر مولوي شېرمحمد وحدت ګډونوالو ته د ښه راغلاست ترڅنګ د شعر او شاعرۍ پر ارزښت خبري وکړې او ويې ويل: شاعري يو سپیڅلې هنر دی، چې په تيرو څلورو لسيزو کې يې د ولسونو په رابیدارولو او په پرهرونو د پټۍ لګولو کې مهم رول لوبولی دی، د اوسني اسلامي نظام په برياليتوب او ساتلو کي د شهيدانو د وينو او قربانيو ترڅنګ د شاعرانو او ترنم ويونکو هڅې هم د ستايلو وړ دي او دا يو روڼ حقيقت دی، چې هيڅ څوک ترې سترګي نشي پټولای.

د مشاعرې په ترڅ کې شاعرانو، ترنم ویونکو او نعت ويونکو خپل ترتیب شوي شعرونه، نظمونه او ترانې وړاندې کړې او د ګډونوالو له تاوده هرکلي سره مخ شول.

د يادونې وړ ده چې د هلمند ولايت د اطلاعاتو او فرهنګ رياست د هنري فعاليتونو د تنظيم مديريت له لوري هره مياشت ورته مشاعرې ترسره کيږي.

۱۴۰۳/۲/۲۶ هـ ل
۲۰۲۴/۵/۱۵ میلادي