۹۷ قلمه لرغوني آثار ملي موزیم ته انتقال شول
د اطلاعاتو او کلتور وزارت د لرغون پېژندنې رياست له لوري ۹۷ قلمه بېلابېل لرغوني آثار ملي موزيم ته انتقال شول.
د لرغون پېژندنې ریاست مسؤلین وايي: ۹۷ قلمه لرغوني آثار، چې د لوګر د مسعینک او د کابل د بګراميو ولسوالۍ د شېوه کيو سټوپې له لرغونو سیمو څخه کشف شوي وو، له لومړنۍ پاک کارۍ، بیارغونې او ثبت وروسته ملي موزیم ته انتقال شول.
دغه آثار چې ملي موزیم ته لېږدول شوي پکښې خټين څراغونه، تیراکوتا، مهرې، د تار اوبدلو دوکې، ستنې، د رنجو سلايي، د مجسمو سرونه او بېلابېل لوښي شامل دي، دا آثار د جوړښت له مخې په ډبرينو، خټينو، ګچي، فلزي او د هډوکو په بڼو دي.
د لرغون پېژندنې ریاست رئیس ذبیحالله سادات وايي: تاریخي آثار د کلتوري عظمت نښه ده، چې د هېواد تاریخي، سیاسي، کلتوري، اقتصادي او ټولنیز هویت ښيي، دا آثار د کوشاني، کوشاني-ساساني او ساساني-کوشاني دورو پورې اړه لري، چې د میلادي دویمې تر اوومې پېړۍ پورې تاريخي مخينه لري.
ښاغلي سادات ټینګار وکړ؛ چې د لرغونو آثارو ساتنه د یو هېواد د کلتور او تاریخ لپاره ډېر مهم رول لري، ځکه دا د پخوانیو انسانانو د تمدن نښې دي، د لرغونو آثارو ساتنه ضروري ده، ترڅو راتلونکي نسلونه يې له تاریخي او کلتوري ارزښت څخه خبر شي.
۱۴۴۶/۸/۶ ق
۱۴۰۳/۱۱/۱۷ ل
