نیمروز کې د خبریال ملي ورځ ولمانځل سوه
د نيمروز ولايت د اطلاعاتو او کلتور رياست له لوري د خبريال ملي ورځ د يوې غونډې په ترڅ کې ولمانځل شوه، چې پکښې د اطلاعاتو او کلتور رياست مسؤلينو، د ملي راډيو تلويزيون کارکوونکو، د امارتي ادارو نشراتي او مطبوعاتي مسؤلينو خبريالانو او د رسنيو مسؤلينو ګډون کړی وو.
د اطلاعاتو او کلتور رئيس مفتي حبیب الله الهام خبريالانو ته د خبريال ملي ورځې د مبارکۍ ترڅنګ، اطلاعاتو ته د لاسرسي حق په اړه هر اړخيزې خبرې وکړې او ويې ويل: د رسنیو فعالیتونه یو روښانه رسالت دی، چې د ټولنې حقایق او واقعیتونه انعکاس کوي.
ښاغلي الهام زیاته کړه؛ د داسې مراسمو ترسره کول له رسنیو او خبریالانو څخه ملاتړ، هڅونه، همږغي او د اړیکو شتون څرګندوي.
د افغان خبريالانو د خونديتوب د ولايتي کمېټې مسؤل عبدالغفار عزيزي د اطلاعاتو او کلتور ریاست له همکارۍ څخه د مننې په څرګندولو سره د اسلامي نظام د دندو او فعالیتونو په انعکاس کولو کې د خبریالانو په مهم رول ټینګار وکړ او په نیمروز کې یې د محلي مسؤلینو د ملاتړ، همغږۍ او اطلاعاتو ته د لاسرسي څخه خوښي څرګنده کړه.
د اطلاعاتو او کلتور ریاست د اطلاعاتو آمر هم له خبریالانو او د رسنیو له مسؤلينو وغوښتل، چې د رسنیو د خپرونو کیفیت لوړ کړي او د راتلونکي کال لپاره د اسلامي امارت د پالیسۍ سره سم ګټور پروګرامونه چمتو کړي.
یاد مراسم د نيمروز د اطلاعاتو او کلتور رياست لخوا خبريالانو ته د دوی د هڅونې په موخه د ستاينليکونو په ډالۍ کولو او دُعا ویلو سره پای ته ورسیدل.
۱۴۴۶/۹/۱۸ ق
۱۴۰۳/۱۲/۲۸ ل
