نیمروز کې د خبريالانو د خونديتوب کمېټې له مسؤل، ځوانانو او د ښوونځيو له استازو سره لیدنه وشوه
د نيمروز ولايت د اطلاعاتو او کلتور رئيس مفتي حبيبالله الهام په لویدیځ زون کې د افغان خبريالانو د خونديتوب د کمېټې له مسؤل شميل احمد مشعل يو شمېر ځوانانو او د ښوونځيو له استازو سره لیدنه وکړه.
په دې لیدنه کې په لويديځ زون کې د افغان خبريالانو د خونديتوب د کميټې مسؤل شمیل احمد مشعل د رسنیو او خبريالانو د ملاتړ له پاره د نيمروز ولايت د اطلاعاتو او کلتور له رياست څخه د مننې ترڅنګ د زياتو همکاريو غوښتنه وکړه او ويې ويل: د خوښۍ ځای دی، چې د ا.ا له واکمنۍ وروسته په نيمروز کې د خبريالانو له خوا هېڅ ډول شکايت نه دی ثبت شوى او خبريالان هم اړ دي، ترڅو د ا.ا د نشراتي پاليسۍ په پام کې نیولو سره فعالیت وکړي، نوموړي زياته کړه؛ هغه رسنۍ چې له هېواده بهر د اسلامي نظام پر ضد فعالیت او نشرات کوي، په حقیقت کې شایعات او پروپاګند خپروي.
د نيمروز د اطلاعاتو او کلتور رئيس مفتي حبيبالله الهام وويل: د اطلاعاتو او کلتور وزارت رهبري د اسلامي نظام د اصولو او تګلارو په پام کې نيولو سره د رسنيو د ودې په موخه هڅې کوي، زمونږ اداره هوډ لري چې له رسنیو او خبریالانو سره همکاري وکړي او د شته امکاناتو په پام کې نیولو سره به د دوی شته ستونزې حل کړي.
همدا راز د اطلاعاتو او کلتور رئیس مفتي حبيبالله الهام د زرنج ښار له یو شمېر ځوانانو او د ښوونځيو له استازو سره هم په خپل کاري دفتر کې وکتل.
یاده لیدنه کې د اطلاعاتو او کلتور رئیس ځوانان وهڅول، تر څو د شته فرصت څخه په استفادې، په ټولنه کې داسي کړنې تر سره کړي، چې نورو وګړو ته ګټه ترې ورسیږي، ښاغلي الهام له ځوانانو وغوښتل چې خپل ژوند ته هدف وټاکئ، ترڅو د دنیا او آخیرت بریا ترلاسه کړئ او همدا راز د خپلو زده کړو د لا غوره والي په موخه زيار او نه ستړې کيدونکې هلې ځلې وکړئ، تر څو هېواد او ټولنه مو روښانه راتلونکې ولري.
د لېدنې په ترڅ کې ځوانانو او د ښوونځيو استازو هم ځينې ستونزې او غوښتنې شريکې کړې، چې د اطلاعاتو او کلتور رئیس له لوري ورته د ستونزو د حل کولو ډاډ ورکړل شو.
۱۴۴۶/۴/۱۳ هـ ق
۱۴۰۳/۷/۲۵ هـ ل
