لغمان کې (د ولس او حکومت ګډ مسؤليتونه) په نامه غونډه جوړه شوه
د لغمان ولایت د اطلاعاتو او کلتور ریاست له لوري د ناوړه دودونو او بې ځايه مصارفو د مخنيوي په اړه د عالیقدر امیرالمومنین حفظه الله د فرمان په اړه (د ولس او حکومت ګډ مسؤليتونه) په نامه ولسي غونډه جوړه شوه.
په ياده غونډه کې د لغمان والي شیخ شیراحمد حقاني ترڅنګ د اطلاعاتو او کلتور رئيس مولوي عبدالنور رسولي، د یو شمېر نورو امارتي ادارو مسؤلینو، قومي مخورو، ځوانانو او سلګونه ولسي خلکو ګډون کړی وو.
د اطلاعاتو او کلتور رئيس مولوي عبدالنور رسولي ګډونوالو ته د عالیقدر امیرالمومنین حفظه الله د ۱۷مې ګڼې فرمان په اړه چې د ناسمو دودونو د مخنیوي په موخه صادر شوی، هر اړخیزه وینا وکړه او زياته يې کړه؛ چې یاد فرمان به لومړی په ځان او بیا د ټولنې په نورو وګړو پلي کوي، همداراز یې د ناسمو دودونو په زيانونو خبرې وکړې او خلک يې د دغه فرمان پلي کولو ته وهڅول.
د لغمان والي ښاغلي حقاني وویل: د یاد فرمان پلي کېدو کې د ولسونو خیر دی، د ولسونو اقتصادي حالت د ناسمو دودونو او بې ځایه مصارفو له امله خراب شوی او د دې فرمان پلې کېدو سره به تر ډېره بریده دغه ستونزه حل شي.
همدا راز د غونډې ګډون کوونکو دیاد فرمان صادرول د ټول ملت لپاره ګټور وباله، او ويې ویل: د فرمان عملي کولو په موخه به کور په کور د عامه پوهاوي پیغامونه رسوي او ټولنه کې به د ناسمو رواجونو له منځه وړلو لپاره پوره هڅې کوي.
۱۴۴۶/۱۱/۱۷ هـ ق
