فاریاب کې د زمري ۲۴مې په مناسبت مشاعره ترسره شوه
د فاریاب د اطلاعاتو او فرهنګ ریاست له لوري د دغه ولایت ښاروالۍ په همکارۍ د زمري ۲۴مې د هرکلي په مناسبت مشاعره ترسره شوه.
په دې مشاعره کې د فاریاب د اطلاعاتو او فرهنګ رئیس مولوي شمسالدین محمدي، د میمنې ښاروال ملا محمدامین فرقاني، د امارتي ادارو یو شمېر رئیسانو، د ګذر وکیلانو، د مشورتي شورا غړو، شاعرانو او لیکوالانو ګډون کړی و.
د اطلاعاتو او فرهنګ رئیس د زمري ۲۴مه د هېواد د معاصر تاریخ له برخلیک ټاکونکو ورځو څخه وبلله او ویې ویل: دا ورځ د اشغال د پای، د خپلواکۍ د بیا ترلاسه کولو او په افغانستان کې د اسلامي حاکمیت د نوي پړاو د پیل نښه ده. نوموړي د خپلو خبرو په یوه برخه کې له شاعرانو او لیکوالانو څخه وغوښتل چې د خپلو ارزښتمنو شعرونو او لیکنو له لارې په ټولنه کې د هیلې، یووالی، دیندارۍ، هېوادپالنې او اسلامي اخلاقو روحیه لا پیاوړې کړي.
وروسته د میمنې ښاروال د زمري ۲۴مه (د فتحې ورځ) د افغانستان د خلکو لپاره د الله تعالی ستر نعمت وباله او ویې ویل: دا نعمت د اسلامي امارت د مجاهدینو د جهاد او سرښندنو په پایله کې مجاهد او خپلواکۍ غوښتونکي افغان ملت ته په برخه شوی دی.
نوموړي د افغانستان بېلابېل قشرونو د عالیقدر امیرالمؤمنین (حفظهالله) د اوامرو او لارښوونو اطاعت ته راوبلل او له خلکو څخه یې وغوښتل چې د دې ستر نعمت قدر وکړي، د اسلامي نظام د پیاوړتیا لپاره هڅې وکړي او د افغانستان اسلامي امارت تر بیرغ لاندې خپل عزتمند ژوند ته دوام ورکړي.
په پای کې یو شمېر شاعرانو او ترانهویونکو خپل شعرونه او ترانې اوریدونکو ته وړاندې کړل چې اوریدونکو یې تود هر کلی او ستاینه وکړه.
۱۴۴۸/۲/۱۵ هـ ق
