شیخ علي او سرخ پارسا ولسوالیو کې د سیرت النبي ﷺ سیالۍ پایلې اعلان شوې

د پروان ولايت په شيخ علي او سرخ پارسا ولسواليو کې د اطلاعاتو او کلتور رياست او تنوير فکري او فرهنګي ادارې لخوا د بېلابېلو ښوونځيو او مدارسو له شاوخوا زر تنو زده کوونکو څخه د سيرت النبي ﷺ برخه کې د اخستل شوې ازموينې پايلې اعلان او غوره ګډونوال په ډاليو ورکولو سره ونازول شول.
د پروان ولایت د اطلاعاتو او کلتور رئیس مولوي شمس الحق صدیقي، په خپلو خبرو کې ځوانانو ته وویل: په دنیا او آخرت کې زموږ کامیابي د سیرت النبي ﷺ تابع داري او د هغه ﷺ سیرت او صورت باندې عمل کولو کې ده.
نوموړي د خپلو خبرو پرمهال وویل: څنګه چې اسلامي امارت ستاسو په څېر ځوانانو د قربانیو په پایله کې بریا ته ورسید او دښمن ته یې ماتې ورکړه، اوس تاسو ځوانانو ته پکار ده، چې په فکري جګړه کې د مغرضو کړیو ښکار نه شئ.
د يادونې وړ ده، چې د سيالۍ د پايلو د اعلان پرمهال د دواړو ولسواليو ۱۵ تنه غوره ګډون کوونکي د ډاليو په ورکولو سره ونازول شول.

۱۴۴۶/۷/۲۰ ق
۱۴۰۳/۱۱/۲ ل