د کاپي رایټ قانون د تطبیق او د لیکوالانو د حقونو د خونديتوب په موخه د مطبعو او کتاب پلورنځیو له مسؤلینو سره ناسته ترسره شوه
د لوګر اطلاعاتو او فرهنګ رئیس مولوي ثواب جان اسلامیار په مشرۍ د اطلاعاتو او فرهنګ وزارت د خپرونو چارو معینیت اړوند د کاپي رایټ آمر مولوي عبدالظاهر مخلص د دغه ولایت د مطبعو، چاپ خونو او کتاب پلورنځیو مسؤلینو سره د کاپي رایټ قانون د تطبیق او د لیکوالانو حقونو د خونديتوب په موخه ناسته ترسره شوه.
د کاپي رایټ آمر مولوي عبدالظاهر مخلص وویل؛ چې د دې ناستې موخه د کاپي رایټ اړوند د نافذه اصولو او مقرراتو تشریح، د چاپ او نشر د طرزالعمل په اړه د معلوماتو شریکول او د چاپي سکتور د مسؤلینو د ستونزو اورېدل دي. نوموړي ډاډ څرګند کړ، چې د مطبعو، چاپ خونو او کتاب پلورنځیو مسؤلینو غوښتنې او وړاندیزونه به د وزارت له مشرتابه سره شریک کړي.
ورته مهال د لوګر اطلاعاتو او فرهنګ رئیس مولوي ثواب جان اسلامیار د کاپي رایټ قانون او اصولو په تطبیق کې د مطبعو، چاپ خونو او کتاب پلورنځیو رول مهم وباله او له اړوندو مسؤلینو څخه یې وغوښتل، چې د تابلوګانو او لوحو په چاپ کې د ملي ژبو اصطلاحاتو او کلماتو کارولو ته ځانګړې پاملرنه وکړي او د لیکوالانو د حقونو د خونديتوب په برخه کې له اړوندو ادارو سره همکارۍ وکړي.
دغه راز د لوګر د مطبعو، چاپ خونو او کتاب پلورنځیو مسؤلینو وویل: د کاپي رایټ د قانون عملي کېدل د لیکوالانو او خپرندویانو د حقونو د خونديتوب لپاره مهم دی. دوی د خپلو فعالیتونو اړوند یو شمېر ستونزې او وړاندیزونه هم له مسؤلینو سره شریک کړل.
۱۴۴۸/۲/۱۷ هـ ق
