د ځوانانو چارو معين د اندخوی ولسوالۍ له ښوونيز مرکز څخه ليدنه وکړه
د اطلاعات او کلتور وزارت د ځوانانو چارو معین مولوي محمد یونس راشد د فاریاب ولايت په اندخوی ولسوالۍ کې د اطلاعاتو او کلتور ریاست د ځوانانو ښوونيز مرکز څخه چې د اکټید دفتر په ملاتړ فعالیت کوي لیدنه وکړه.
له دې ليدنې څخه موخه د ښوونيز مرکز د ستونزو او فرصتونو ارزونه او د ځوانانو لپاره د خدمتونو د کیفیت د ښهوالي لپاره پلان جوړول وو.
د لیدنې په ترڅ کې د ښوونيز مرکز مسؤلینو د زده کړو د بهیر او د هغو مهارتونو د زده کړې په اړه معلومات وړاندې کړل، چې د ځوانانو د فردي او ټولنیزې ودې لپاره دلته تدريس کېږي.
د ځوانانو چارو معين مولوي محمد یونس راشد د ښوونيز مرکز له فعالیتونو څخه د خوښۍ څرګندونه وکړه او ټینګار يې وکړ، چې د ځوانانو د مهارتونو د پیاوړتیا او د کار بازار ته د چمتووالي لپاره باید مسلکي او تخصصي زده کړو ته ډېر پام وشي.
نوموړي د زده کړیزو او کلتوري فرصتونو د زیاتوالي اړتیا ته هم اشاره وکړه او د ځوانانو د علمي ظرفيت لوړونې په برخه کې يې د یاد ښوونيز مرکز له مسؤلینو څخه مننه وکړه.
۱۴۴۶/۵/۱۴ هـ ق
۱۴۰۳/۸/۲۶ هـ ل
