د وزیر ژوند لیک

مېرمن حسينه صافۍ د ښاغلي الحاج عبدالرحيم جلالي  لور او د ١٣٥٣ ل.ل کال  په ليندۍ مياشت کې یې په لغمان ولايت کې نړۍ ته سترګې وغړولې.

 د لومړنیو او ثانوي زده کړو سند یې په ۱۳۷۴ ل.ل کال کې له ناهید شهید او ملالۍ لیسو څخه تر لاسه کړل او د  بکلوریا وروسته یې خپلو زده کړو ته په دارالمعلمین کې ادوم ورکړ او له دې سره یې د انګلېسي ژبې د پرمختللې مکالمې ډېپلوم هم ترلاسه کړ.

بیا یې له حقوقو او سیاسي علومو سره د زیاتې لېوالتیا له مخې په ۱۳۹۸ ل.ل کال له طلوع افتاب پوهنتون څخه د حقوقو او سیاسي علومو په څانګه کې ډېپلوم واخیست. نوموړې په  پښتو، دري، اردو او انګليسي ژبو کې پوره لاس رسی لري.

 

 ميرمن صافۍ  څه له پاسه شل کلونه د سازماني پراختيا، د پاليسيو جوړولو او د ښځو د پیاوړتیا برنامو، د ظرفيت لوړولو، د ښځو د حقونو لپاره د عدالت غوښتنې، سولې او بشري حقونو د تامينولو، د متمرکزې پراختيا او پرمختګ په برخه کې کار کړی دی. 

آغلې صافۍ لا پنځلس کلنه وه، چې د کډوالۍ په کلونو کې خپله لومړنۍ  مبارزه او فعاليتونه د کتابتون د کتابدارۍ په برخه کې په پاکستان کې د افغان کډوالو ښځو لپاره پیل کړه او بیا یې په ملي او نړيوالو مؤسسو لکه د ( نجات نړېوالې کميټې د کنټري‌ګرامر ښوونځي ډاکار، د کډوالو نړېوالې موسسې، د افغان ښځو تعليمي مرکز، د ملګروملتو پراختیايي پروګرام، د افغان ښځو شبکې او په حکومتي کچ یې د سولې عالي شورا د اجراییه غړې په توګه بریالۍ دندې ترسره کړې دي. 

نوموړې همداراز د افغان ښځینه وو په استازيتوب د ښځو حالت د غوره والي په موخه د لندن، کابل، د بن دويم او له شيکاګو کنفرانسو سربیره یې په دوديزه لويه جرګه، د سولې  مشورتي جرګې، د سولې د نارسمي  مستقيمو خبرو، د عالي رتبه کنفرانسونو او په نورو ملي او نړیوالو ناستو کې فعاله ونډه اخیستې ده، چې د دغو ټولو فعالیتونو له آمله آغلې صافۍ څو ځله ستاېل شوې هم ده. له دې ډلې یې د بي بي خدیجې ایوارډ د یادولو وړ دی.

 آغلې صافۍ د ښوونې او روزنې ستره  ملاتړې ده او په دې باور ده، چې د ښوونې او روزنې کيفيت د يو ملت د پايښت لپاره د حل بنسټیزه لار ده چې د مهارت، تجربې او تخصص د شریکولو پراساس یې ترلاسه کولای شو. همداراز هغه په  انډوليز شخصي او مسلکي  ژوندانه عقيده لري .

 

moic