د هلمند له وړيا ښوونيز مرکز څخه لسګونه ځوانان فارغ شول
د هلمند ولایت د اطلاعاتو او کلتور ریاست د ځوانانو چارو آمریت له وړیا ښوونيز مرکز څخه په پنځمه دوره کې د عربي ژبې تر شپږ مياشتنيو زده کړو وروسته ۵۲ تنه ځوانان فارغ شول.
د ځوانانو چارو آمر د هلمند وړیا ښوونیز مرکز له استاذانو څخه مننه وکړه، چې د هېواد بچیانو لپاره شپه او ورځ هڅې کوي، ترڅو د هېواد راتلونکی نسل ښه وروزي.
نوموړي وویل: په یاد ښوونیز مرکز کې يې زده کوونکو ته په بېلابېلو برخو کې د زده کړو زمينه برابره کړې ده، چې دا دی نن مو د عربي ژبې له ۵۲ زده کوونکو څخه تر شپږ مياشتنيو زده کړو وروسته نهايي ازموينه واخېسته.
د یاد ښوونیز مرکز زده کوونکو د اسلامي امارت له مسؤلینو څخه مننه وکړه، چې د ځوانانو روزلو ته ځانګړې پاملرنه کوي.
د یادونې وړ ده، چې تر دې مهاله د هلمند له وړيا ښوونيز مرکز څخه شاوخوا زر تنه زده کوونکي په بېلابېلو برخو کې تر زده کړو وروسته فارغ شوي دي.
۱۴۴۶/۹/۲۰ ق
۱۴۰۳/۱۲/۳۰ ل
