د غور ولايت د اطلاعاتو او کلتور رئيس له تاريخي آبدو څخه ليدنه وکړه
د غور ولايت د اطلاعاتو او کلتور رياست رئيس مولوي عبدالحی زعيم د سنګ بار تاريخي کلا څخه د ليدنې په ترڅ کې د دې آبدې د وضعيت ارزونه وکړه او د يادې تاريخي آبدې په ساتنه يې ټينګار وکړ.
نوموړي د تاريخي آبدو ساتنه د ټولو ولسونو مسؤليت وبللو او ويې ويل: تاريخي آبدې او ځايونه د افغانستان د هويت ښکارندوی دي او هر افغان يې په ساتنه مکلف دی.
ښاغلي زعيم د سنګ بار تاريخي کلا ته د بارانونو، طوفانونو او سېلابونو له امله د اوښتو زيانونو د څېړلو پرمهال د غور ولايت د اطلاعاتو او کلتور رياست د تاريخي اثارو د ساتنې مسؤل ته لارښوونه وکړه، چې د ساتنې لپاره يې لازم تدابير ونيسي.
نوموړي دغه راز له بېلابېلو بنسټونو او مؤسسو څخه چې د تاريخي او لرغونو آبداتو د بيارغونې په برخه کې د مرستې وړتيا لري، وغوښتل چې د اطلاعاتو او کلتور له رياست سره د تاريخي آبداتو د رغولو په برخه کې همکاري وکړي.
۱۴۴۶/۴/۹ هـ ق
۱۴۰۳/۷/۲۱ هـ ل
