د رسنيو له مسؤلينو او خبريالانو سره د رسنيز وضعيت ارزولو په موخه ناسته وشوه
د لغمان ولايت د اطلاعاتو او کلتور ریاست مسؤلينو د محلي رسنیو له مسؤلينو او خبريالانو سره د رسنيز وضعيت ارزولو او ستونزو ته د رسيدنې په موخه ناسته وکړه.
په دې ناسته کې د لغمان ولایت د محلي رسنیو مسؤلينو د اطلاعاتو او کلتور ریاست له همکاریو څخه د مننې ترڅنګ د رسنیو پر کاري وضعیت، ستونزو او ننګونو خبرې وکړې.
د اطلاعاتو او کلتور رئیس مولوي عبدالنور رسولي وویل: د اسلامي امارت مسؤلين له رسنیو او خبریالانو سره پوره همکاریو ته ژمن دي او ډاډ یې ورکړ، چې دغه ولایت کې به د خبریالانو لپاره لا ډېرې اسانتیاوې برابره شي.
نوموړي زیاته کړه، چې خبریالانو ته په روغتیایي برخو کې د فیس او درملو اړوند ځانګړي تخفیف زمینه برابرولو په موخه، د عامې روغتیا ریاست سره خبرې پیل کړي دي.
۱۴۴۶/۱۱/۳۰ هـ ق
