د دولتي ادارو مطبوعاتي مسوولینو او خبریالانو سره د همغږۍ غونډه وشوه

د بامیان ولایت د اطلاعاتو او کلتور ریاست د دولتي ادارو مطبوعاتي مسوولینو او خبریالانو سره د یوناما ادارې په همکارۍ د همغږۍ غونډه شوه.
د بامیان د اطلاعاتو او کلتور رئیس قاري سید مصطفی صالح د دقیق، پر وخت او متوازن خبرونو وړاندې کول مهم وګڼل او خبریالان یې د تبلیغاتي جګړې او د پردیو پروپاګند پر وړاندې د هېواد واقعي اتلان یاد کړل.
ښاغلي صالح وویل: افغانستان د نړۍ تر ټولو زیات د تبلیغاتي او نظامي جګړو موخه ګرځېدلی دی او اوس چې د سولې، ورورۍ او برابرۍ فضاء منځته راغلې ده، پردي هڅه کوي چې د خپلو دروغجنو تبلیغاتو سره فضاء ګډوډه کړي او د خلکو افکار خراب کړي؛ همدارنګه یې له خبریالانو وغوښتل، چې په خپلو راپورونو او خبرونو کې د ژورنالیزم اصول، لکه: حقیقت، چټکتیا، بې طرفي او توازن په ټولنیزو او واقعي پېښو کې پام کې ونیسي. 
بامیان کې د یوناما دفتر د مطبوعاتو مسوول جعفر رحیم وویل، چې د مطبوعاتو آزادي، معلوماتو ته لاسرسی، د خبریالانو او دولتي ادارو د مطبوعاتي مسوولینو تر منځ همغږي د قناعت وړ ده او زیاته یې کړه، چې د اسلامي امارت حکومت له درېیو کلنو را پدې خوا بامیانو ولایت په رسنیزو چارو کې مثبت بدلونونه راغلي دي.
په پای کې د بامیان ولایت د خبریالانو د خوندیتوب کمیټې مسوول سید امین همتا، د موجودو رسنیزو ستونزو په اړه خبرې وکړې او ویې ویل چې په بامیانو کې د رسنیو او خبریالانو لپاره هېڅ ډول محدودیت شتون نه لري.

۱۴۴۶/۸/۲۱ هـ. س
۱۴۰۳/۱۲/۲ هـ. ل