د امير بند په ملي پارک کې د ګرځندوى فصل د پيل جشن جوړ شو

د ګرځندوى فصل د پيل په مناسبت پرون د باميانو په امير بند کې د ګرځندوی جشن د ګرځندوی د زرګونو مينه والو په ګډون جوړ شو.
د باختر آژانس د خبر له مخې؛ دغه جشن د اطلاعاتو او فرهنګ رياست د يکاولنګ ولسوالۍ او د غلغله، چاربرج هايلند، راه ابريشم او کوه بابا د هوټلونو په همکارۍ د دولتي ادارو د رييسانو، ولسوالانو، هنرمندانو، فرهنګيانو او مېلمنو په ګډون جوړ کړ.
د دغه جشن د مراسمو په پيل کې د باميانو د اطلاعاتو او فرهنګ رييس اسحاق موحد د ګرځندوی، د ګرځندوی د جاذبو او په دې برخه کې د باميانو د ښکلا په اړوند خبرې وکړې.
هغه د دغه جشن د جوړولو موخه په باميانو کې د ګرځندوی صنعت د ودې لپاره هلې ځلې وبللې او ويې ويل: باميان د افغانستان مېلمستون دى.
دغه راز هغه هيله څرګننده کړه چې په دغه جشن کې د ګډون په موخه زيات سيلانيان باميانو ته راشي.
وروسته د يکاولنګ ولسوال عظيم فريد د دغه جشن د جوړونکو بنسټونو څخه مننه او قدرداني وکړه او زياته يې کړه چې د امير بند د افغانستان ملي پارک دى او د افغانستان په ټولو خلکو پورې اړه لري.
هغه څرګنده کړه چې سيمه یيزه اداره تل د فرهنګي پروګرامونو ملاتړ کړى دى او د هغو مېلمنو د امنيت د تامينولو ډاډ ورکړ چې د امير بند ملي پارک ته راځي.
په دغه جشن کې د باميانو د اطلاعاتو او فرهنګ رياست او د سينماګرانو د تياتر هنرمندانو هم هنري پارچې اجرا کړې.

کابل/ د غبرګولي ۸ مه/ باختر