د اطلاعاتو او کلتور وزارت پلاوي د ابومسلم خراساني له تاریخي آبدې څخه لیدنه وکړه
د اطلاعاتو او کلتور وزارت د تاريخي آبداتو ساتنې رئیس انجینر محمد حسیب نسیمي د لوګر اطلاعاتو او کلتور ریاست مسؤلینو په ملتیا د دغه ولایت د برکي برک ولسوالۍ اړوند ابو مسلم خراساني له تاریخي آبدې څخه لیدنه وکړه.
انجینر محمد حسیب نسیمي وویل: د ابومسلم خراساني آبده د لوګر او سيمې لپاره ډېر ارزښت لري او د لرغونو آثارو یو ښه بیلګه ده، چې د یادې آبدې د بیارغولو په موخه ورڅخه لیدنه وشوه.
د لوګر اطلاعاتو او کلتور رئيس مولوي فیض الله جوهري د لرغونو آثارو د ساتنې په برخه کې د بشپړې پاملرنې ډاد ورکړ او د اطلاعاتو او کلتور وزارت څخه یې وغوښتل، چې د دغې آبدې تر څنګ د یو شمېر نورو لرغونو آبدو رغولو کې همکاری وکړي.
د یادونې وړ ده، چې یاد پلاوي د ابو مسلم خراساني آبدې ترڅنګ د خواجه احمد سجاوندي له لرغونې آبدې څخه هم لیدنه وکړه.
۱۴۴۷/۴/۲۸ هـ ق
