د اطلاعاتو او کلتور وزارت وزير ښاغلي الحاج ملا خیرالله خیرخواه د افغانستان او ناروې د مستقل کمېسيون له رئيس سره وکتل

سه شنبه ( ۲۷ د ذوالحجې ۱۴۴۶) د اطلاعاتو او کلتور وزارت وزير ښاغلي الحاج ملا خیرالله خیرخواه د ناروې شاهي دولت د افغانستان او ناروې د مستقل کمېسيون رئيس ښاغلي بیورن تور ګودال او مل پلاوي سره په خپل کاري دفتر کې وکتل.
د لیدنې په پیل کې د یاد کمېسيون رئیس ښاغلي تورګودال د کمېسيون د مسؤلیتونو په اړه  وزیر صیب ته معلومات وړاندې کړل او زیاته یې کړه؛ چې موږ ته دنده راسپارل شوې، تر څو له ۲۰۱۵م کال څخه تر ۲۰۲۱م کال پورې او له هغې وروسته په افغانستان کې د ناروې شاهي دولت د سیاسي او بشري مرستو او نورو برخو کې فعالیتونه وارزوو.
 ښاغلي ګودال ژمنه وکړه، چې هېواد به يې له افغانستان سره په بېلابېلو برخو کې خپلو مرستو ته دوام ورکړي.
همدا راز ښاغلي الحاج ملا خیرالله خیرخواه د ناروې شاهي دولت پلاوي ته د ښه راغلاست ترڅنګ وویل: نننی افغانستان له څلوېښتو کلونو وروسته یو ځواکمن نظام لري، چې په ټول هېواد کې یې امنیت تامین کړی او خلک د دې خاورې هرې خوا ته په ازاده توګه سفر کولی شي.
 ښاغلي خیرخواه صاحب زیاته کړه؛ د افغانستان اسلامي امارت له لوري د هېواد په بېلابېلو سیمو کې پراختیايي او رغنیزې پروژې روانې دي، او د نشه‌يي توکو پر ضد جدي مبارزه کېږي.
په پای کې، دواړو لوریو د يادو هېوادونو ترمنځ د اړیکو پر پیاوړتیا او پراختیا ټینګار وکړ.

۱۴۰۴/۴/۳ ھـ ل