د اطلاعاتو او کلتور ریاست له ژمنيو کورسونو څخه لسګونه تنه فارغ شول

 د پکتيا ولايت د اطلاعاتو او کلتور ریاست اړوند د ځوانانو چارو آمریت په ښوونيز مرکز کې له ژمنیو کورسونو څخه ۷۰ تنه د يوې غونډې په ترڅ کې فارغ شول. 
د فراغت غونډې په دې مراسمو کې د اطلاعاتو او کلتور رياست رئیس مولوي ثواب جان اسلام یار وویل: هڅه کوو چې د ځوانانو د فکري او عصري روزنې په موخه په بېلابېلو برخو کې ښوونیز پروګرامونه جوړ کړو، تر څو ځوان نسل مو پر فکري او عصري زده کړو سمبال ټولنې ته د خدمت په موخه وړاندې شي. 
د ځوانانو چارو آمر وویل: یاد شمېر کسانو ته د دیني، اصلاحي، انګلیسي، ریاضي او کمپیوټر په برخو کې په وړیا ډول درې میاشتنۍ زده کړې ورکړل شوي دي. 
د ژمنیو کورسونو څخه فارغ شویو زده کوونکو خوښي وښوده او غوښتنه یې وکړه، چې د ځوانانو د روزنې دا لړۍ دې دوامداره وساتل شي. 
مسؤلینو ډاډ ورکړ، چې هڅه کوو د کورسونو او د ځوان نسل د روزنې دغه لړۍ دوامداره وساتو.
د فراغت په دې غونډه کې استادانو او مخکښو زده کوونکو ته د مسؤلینو په لاس یو شمېر ډالۍ هم ورکړل شوې.

۱۴۴۶/۹/۱۷ ق
۱۴۰۳/۱۲/۲۷ ل