د اطلاعاتو او کلتور رئيس له يو شمېر راډيوګانو ليدنه وکړه
د ننګرهار ولايت د اطلاعاتو او کلتور رئيس مولوي ذبيح الله نوراني د اطلاعاتو د آمر په ملتيا د جلال آباد ښار له يو شمېر اېف اېم راډيوګانو ليدنه وکړه او د هغوی چارې يې وارزولې.
نوموړي د ارزښت، اتفاق نوين او صفا راديوګانو له نشراتي او تخنيکي بهير څخه د ليدنې پرمهال د دغو رسنيو له مسؤلينو سره جلا جلا ناستې وکړې او د هغوی د خپرونو مهالوېشونه او تخنيکي چارې يې له نږدې وکتلې او وارزولې.
ښاغلي نوراني وويل: هره رسنۍ مسؤليت لري، چې د خپلو خلکو د سوکالۍ، د هېواد آبادۍ او د کلتوري او اسلامي ارزښتونو پياوړتيا لپاره کار وکړي، خپلو خلکو ته عامه پوهاوی ورکړي او د خپل نشراتي بهير لا ښه والي لپاره هڅې وکړي.
نوموړی د ټولو رسنيو مسؤلينو ته د هر ډول همکارۍ ډاډ ورکړ او زياته يې کړه؛ د اطلاعاتو او کلتور وزارت د هغو رسنيو، چې د ملت د پرمختګ او سوکالۍ لپاره کار کوي، ستاینه او قدردانی کوي.
۱۴۴۶/۱۱/۱۶ هـ ق
