د اطلاعاتو او فرهنګ وزارت اعلامیه
د افغانستان د خلکو دښمنانو د خپلو کرغېړنو موخو لپاره پخوا هم له فرهنګي ارزښتونو کار اخیستی دی، دا ځل یې د خپلو بشري ضد جنایتونو په دوام کرغېړنه هڅه وکړه چې د موسیقۍ آله د ترهګریز برید د ترسره کولو لپاره وکاروي. هغوی چاودېدونکي توکي په رباب کې ځای پر ځای کړي وو او غوښتل یې چې هغه د کام ایر شرکت الوتکې ته چې هرات- کابل پرواز یې ترسره کاوه، ولېږدوي او بیا چاودنه ورکړي او فاجعه رامنځ ته کړي. له ښه مرغه د هرات هوایي ډګر امنیتي موظفینو د ترهګرو دا توطیه کشف او شنډه کړه. د پېښې عامل یې نیولی او د قانون منګولو ته یې سپارلی دی.
دا په داسې حال کې ده چې د اطلاعاتو او فرهنګ وزارت د نړۍ د فرهنګي او هنري اثارو په نوملړ کې د رباب د شاملولو ا ړوند اسناد یونسکو ته استولي دي. د اطلاعاتو او فرهنګ وزارت د ترهګریزو موخو لپاره د موسیقۍ آلاتو کارول په کلکو ټکو غندي او یو ځل بیا د هېواد د فرهنګي میراث او اثارو د ساتنې لپاره خپله کلکه ژمنتیا نوې کوي.
کابل/ د چنګاښ ۱۲ مه/ باختر
