د اسلامي همکاریو سازمان د افغانستان د فرهنګي میراثونو د بنسټونو د پیاوړتیا په برخه کې همکاري کوي 

د اطلاعاتو او فرهنګ وزارت د فرهنګ او هنر معین مولوی عتیق الله عزیزي په خپل کاري دفتر کې د اسلامي همکاریو سازمان (OIC) د بشري چارو مرستیال خلیل ابراهیم اوکور سره وکتل.
په دې لیدنه کې د افغانستان د تاریخي اثارو د ساتنې، د تاریخي آثارو درې‌بعدي (3D) ډیجیټلي ثبت کولو او د فرهنګي بنسټونو د عصري کولو په اړه بحث وشو.
د فرهنګ او هنر معین مولوی عتیق الله د افغانستان د تاریخي او فرهنګي ارزښتونو په اړه خبرې وکړې او ویې ویل: د افغانستان فرهنګي میراثونه د اسلامي نړۍ سره په تاریخي او دیني اړخونو کې ګډ او مهم مشترکات لري او ګڼ تاریخي آثار، ابدات، لرغونې سیمې، خطي نسخې او فرهنګي میراثونه شتون لري  چې ساتنه یې د اسلامي هېوادونو فرهنګي مکلفیت جوړېږي.
ښاغلي عزیزي د اسلامي همکاریو سازمان له مرستیال څخه وغوښتل چې د عامه کتابتونونو، ملي آرشیف، ملي موزیم او هنرستان ریاستونو د پیاوړتیا او عصري کولو برخو کې ځانګړې پاملرنه وکړي.
دغه راز د اسلامي همکاریو سازمان د بشري چارو مرستیال خلیل ابراهیم اوکور د اطلاعاتو او فرهنګ وزارت د فرهنګي فعالیتونو او د فرهنګ او هنر معین د هڅو ستاینه وکړه او زیاته یې کړه، چې د ګډو همکاریو له لارې به د افغانستان تاریخي او فرهنګي ارزښتونو د ساتنې، بیارغونې، ډیجیټلي ثبت او نړیوال معرفي کولو لپاره عملي ګامونه پورته شي.
نوموړي ډاډ څرګند کړ، چې د افغان متخصصینو لپاره به د بهرنیو هېوادونو د روزنیزو او علمي پروګرامونو زمینه هم برابره شي، ترڅو د نویو تجربو او معیاري مهارتونو د ترلاسه کولو فرصتونه زیات شي.
د ښاغلي ابراهیم اوکور په وینا؛ اسلامي همکاریو سازمان هڅه کوي، چې له اسلامي هېوادونو او نړیوالو فرهنګي بنسټونو سره د افغانستان فرهنګي اړیکې لا پیاوړې کړي او په ګډه د افغانستان د تاریخي او فرهنګي میراثونو د ساتنې لپاره عملي پروګرامونه تطبیق کړي.
دغه راز دواړو لورو د هېواد په فرهنګي او تاریخي برخو کې د افغان متخصصینو د ظرفیت لوړونې په اړه هم خبرې وکړې.

۱۴۴۷/۱۲/۲ هـ ق