اطلاعاتو او فرهنګ وزیر: د کندهار یو شمېر تاریخي آبدې به ورغول شي

د اطلاعات او کلتور سرپرست وزير ملا خير الله خير خواه کندهار ته په سفر کې د دغه ولایت د اطلاعاتو او فرهنګ ریاست ستونزې، غوښتنې او وړاندیزونه واورېدل.
د کندهار د اطلاعات او کلتور رئیس مولوي نور احمد سعيد د روانو فرهنګي فعاليتونو په اړه د اطلاعات او فرهنګ له وزير سره هر اړخيز معلومات شريک کړل.
سعید يو شمېر ستونزې، پيشنهادونه، وړانديزونه او غوښتنې هم د اطلاعات او فرهنګ له وزير سره شريکې کړې او په دې برخه کې یې د همکارۍ غوښتنه وکړه، چې په راتلوونکي کې چارې نورې هم په منظم او ښه شکل ترسره شي.
د اطلاعات او کلتور وزير ملا خير الله خير خواه د کندهار د اطلاعات او کلتور د رئيس تر خبرو اورېدو وروسته ډاډ ورکړ، چې په ډېر منظم ډول به د اطلاعات او کلتور رياستونو ټولو اړتياوو او د ستونزو حل ته پاملرنه کېږي، چي په دې برخه کې د کندهار اطلاعات او فرهنګ ریاست په لومړي قدم کې دی.
ښاغلي خير خواه د کندهار د اطلاعات او کلتور رياست روان فرهنګي او کلتوري فعاليتونه ډېر ګټور او مهم وبلل او د کندهار له مسئولينو یې مننه وکړه، چې په لږ موده او کمو امکاناتو یې ډېر کار ترسره کړی دی.
نوموړي ډاډ ورکړ، چې وزارت به د کندهار د اطلاعات او فرهنګ رياست ټولې غوښتني، اړتياوې او ستونزې ډېرې جدي ونيسي او د حل لپاره به یې اقدام وکړي.
د اطلاعاتو او فرهنګ وزیر وویل چې د کندهار د یو شمېر تاریخي ابدو د رغونې لپاره پلان موجود دی او د ټولو چارو تر طی مراحل کولو وروسته به یې د بیا رغونې چارې پیل شي.
د يادونې وړ ده چې د اطلاعات او کلتور وزير د کندهار د طلاعاتو او کلتور ریاست کارکوونکي د ښو چارو ترسره کولو له امله په نغدي مکافاتو هم ونازول.

کابل، د زمري ۱۹ مه، باختر