کندهار کې شاعرانو او ترانه ویونکو ته روزنیز پروګرام ترسره شو
د اطلاعاتو او فرهنګ وزارت د ترنم او ترانو ریاست او د کندهار اطلاعاتو او فرهنګ ریاست په ګډه همکارۍ د احمد شاه بابا (رح) کور کې شاعرانو او ترانه ویونکو ته روزنیز پروګرام ترسره شو.
په دغه پروګرام کې د اطلاعاتو او فرهنګ وزارت د هنر او فرهنګ معین شیخ عبدالرحمن طیبي، د اسلامي امارت ویاند مولوي ذبیح الله مجاهد، د ترنم او ترانو رئیس مولوي امان الله مستغفر، د کندهار د اطلاعاتو او فرهنګ رئیس مولوي انعام الله سمنګاني، د تاریخي آبداتو رئیس انجینر محمد حسیب نسیمي، د سیمه ییزو ادارو یو شمېر مسؤلینو او ګڼ شمېر لیکوالانو، شاعرانو او ترانه ویونکو ګډون کړی و.
د کندهار د اطلاعاتو او فرهنګ رئیس مولوي انعام الله سمنګاني ګډونوالو ته د ښه راغلاست ترڅنګ وویل: لیکوالان د ټولنې معنوي شتمني ده او د ټولنې په اصلاح کې خورا مهم رول لري، مشرتابه (حفظه الله) د مشاعرو تنظیم قانون کې داسي قوانین جوړ کړي دي، چي د شاعرانو د فعالیتونو ترڅنګ د ټولنې اصلاح هم په پام کې نیول شوې ده.
دغه راز د فرهنګ او هنر معین شیخ عبدالرحمن طیبي د کندهار د اطلاعاتو او فرهنګ ریاست او د تاریخي آبداتو ساتنې ریاست څخه مننه وکړه، چې د احمد شاه بابا کور یې ترمیم کړی او د دا ډول ادبي مجلسونو د جوړېدو لپاره یې چمتو کړی دی. نوموړي زیاته کړه؛ چې لیکوالان او شاعران د ټولنې په اصلاح کې اغېزمن رول لري، باید د نظام ښېګڼي بیان کړي، ترڅو ټولنه او خلک یې پر حقیقي ارزښت پوه شي.
د پروګرام په لړ کې د اسلامي امارت ویاند مولوي ذبیح الله مجاهد د احمد شاه بابا کور د بیارغونې او تاریخي ارزښت په اړه هر اړخیزي خبري وکړې او زیاته یې کړه، چې احمد شاه بابا د افغانستان په تاریخ کې د یوه ستر شخصیت ترڅنګ د تصوف او لیکوالۍ په برخه کې هم ځانګړی ځای لري، له همدې امله، موږ ته پکار ده چې د فرهنګي میراثونو څخه یې الهام واخلو.
ورته مهال د ترنم او ترانو رئیس مولوي امان الله مستغفر شاعرانو او ترانه ویونکو ته لازمې سپارښتنې وکړې او ویې ویل: دوی باید د ټولنې په اصلاح کې خپل مهم مسئولیتونه په ښه توګه ترسره کړي.
د یادوني وړ ده، چي په دې غونډه کې د کندهار ولایت د بېلابېلو ولسوالیو څخه راغلو ترانه ویونکو په خپلو خوږو آوازونو ترانې او ترنمونه هم ګډونوالو ته واورول.
۱۴۴۸/۵/۱۶ هـ ق