سرپل کې د (د چاپېریال ساتنې په برخه کې د ځوانانو رول) په نوم یو ورځنی علمي او روزنیز سیمینار وړاندې شو

د سرپل ولایت د اطلاعاتو او فرهنګ ریاست، د چاپېریال ساتنې ریاست او د اکتېد دفتر په ګډو همکاریو د سیمه‌ییزو ادارو د مسوولینو په شتون کې ځوانانو ته د (د چاپېریال ساتنې په برخه کې د ځوانانو رول) په نوم یو ورځنی علمي او روزنیز سیمینار وړاندې شو.
د سیمینار په پیل کې د سرپل ولایت مقام د کارکوونکو چارو آمر د دغه علمي او ښوونیز سیمینار له جوړونکو څخه مننه وکړه او ویې ویل: نن تر بل هر وخت هېواد پیاوړو، ژمنو او په بېلابېلو برخو کې مسلکي ځوانانو ته اړتیا لري. ځوانان باید د چاپېریال په ساتنه او له تخریب څخه یې د مخنیوي په برخه کې هڅې وکړي، ترڅو سالمه او له ناروغیو پاکه ټولنه ولرو.
ورپسې د سرپل ولایت د اطلاعاتو او فرهنګ رییس ملا عبدالغفار حقنما سالم چاپېریال د ارام او سالم ژوند بنسټ وباله او ویې ویل: اوسنی نظام په ټولو برخو کې د ځوانانو خدمت، ژمنتیا او د مسوولیت احساس ته اړتیا لري. ځوانان باید د چاپېریال ساتنې او نورو ټولنیزو برخو کې په پوره توان فعال رول ولوبوي.
ورته مهال د چاپېریال ساتنې ریاست د طبیعي میراثونو د ساتنې مدیر د اقلیمي بدلون، د ناروغیو د خپرېدو او د هغو د اغېزو په اړه معلومات وړاندې کړل او ځوانان یې د چاپېریال د لا ډېرو تخریب د مخنیوي لپاره خلاق او بدلون راوستونکی ځواک وباله.
د سرپل ولایت د اکتېد دفتر رییس وویل: د دغه سیمینار موخه د چاپېریال ساتنې د اهمیت په اړه د ځوانانو پوهاوی، د اوبو د بې‌ځایه مصرف مخنیوي او د طبیعي سرچینو په ساتنه کې د ځوانانو د فعال رول اداء کولو ته هڅول دي.
په پای کې ګډونوالو د دغه علمي او روزنیز سیمینار له جوړېدو څخه خوښي څرګنده کړه او ژمنه یې وکړه، چې د چاپېریال د تخریب د مخنیوي، د اوبو د سمې استفادې او د ټولنې د عامه پوهاوي په برخه کې به فعال رول ترسره کړي.
۱۴۴۸/۲/۱۴ هـ ق