د اطلاعاتو او فرهنګ رئیس د حصه اول او مرکزي بهسود ولسوالیو له مسؤلینو او اوسېدونکو سره وکتل

د میدان وردګو د اطلاعاتو او فرهنګ رئیس په مشرۍ یو پلاوي د مرکزي او حصه اول بهسود ولسوالیو ته سفر وکړ او د یادو ولسوالیو له ولسوالانو او اوسېدونکو سره یې وکتل.
د دغه سفر موخه مسؤلینو او ولسونو سره د جهادي اثارو راټولولو په اړه د معلوماتو شریکول او د جهادي اثارو د راټولولو په برخه کې د خلکو هڅول وو.
د اطلاعاتو او فرهنګ رئیس وویل: هڅه کېږي چې د تېر امریکایي اشغال پر وړاندې د جهاد په مهال د شهید شویو مجاهدینو په یاد تاریخي څلي او منارونه جوړ شي او هغه وسلې او تجهیزات چې مجاهدینو له اشغالګرو څخه د جګړو پر مهال نیولي، د غنیمت په توګه یې ترلاسه کړي یا یې په خپلو لاسونو جوړ کړي په مجاهد موزیم کې خوندي او نندارې ته وړاندې شي.
نوموړي له ولسوالانو او خلکو څخه وغوښتل چې د مجاهد موزیم د لا غني کولو په موخه د شهیدانو اړوند تاریخي اثار او د جهاد له دورې پاتې وسایل راټول او دغه موزیم ته یې وسپاري.
ورته مهال د یادو ولسوالیو ولسوالانو د جهادي اثارو د راټولولو او خوندي کولو دغه اقدام وستایه او دا یې د جهادي تاریخ د ساتنې په برخه کې مهم وباله. دوی په دې برخه کې د هر ډول همکارۍ ډاډ هم ورکړ.
همدارنګه د دغو ولسوالیو اوسېدونکو هم د جهادي آثارو راټولو او موزیم ته سپارلو په برخو کې د هر اړخیزې همکارۍ ډاډ څرګند کړ.

۱۴۴۸/۳/۲۶ هـ ق