بغلان کې د ځوانانو د فکري ویښتیا په موخه سمینار ترسره شو
د بغلان ولايت د اطلاعاتو او کلتور ریاست د ځوانانو چارو آمریت له لوري د مرکزي بغلان په نوي بغلان لیسه کې شاوخوا سل تنه ځوانانو ته د فکري ویښتیا سمینار ترسره شو.
د ځوانانو چارو آمر قاري محمد عبدالرحمن وویل: دغه سمینار د اطلاعاتو او کلتور ریاست اړوند د مرکزي بغلان د رضاکاره ځوانانو ټولنې له لوري جوړ شوی وو، چې د بیلابیلو سیمو او قشرونو سل تنه ځوانانو پکې ګډون کړی وو.
نوموړي زیاته کړه؛ دا سمینار د ځوانانو فکري ویښتیا، رضاکارانه فعالیتونو ته د هغوی راجلبولو او په ټولنه کې د خپلو او نورو مسؤلیتونو د درک په موخه جوړ شو، چې ګډونوالو ته د یادو موخو په اړه هراړخیز، مفصل او د پام وړ معلومات وړاندې شول.
د دې سمینار دوه تنه برخه والو سید ولي او محمد حمزه وویل: دا سمینار زیات ګټور وو، دوی غوښتنه وکړه، چې د نوي نسل د فکري، ټولنیزو او کلتوري معلوماتو د زیاتولو په موخه دې ورته اوږدمهاله سمینارونه د اړوندو ادارو او بنسټونو له لوري جوړ شي.
۱۴۴۶/۵/۱۸ هـ ق
۱۴۰۳/۸/۳۰ هـ ل
