پکتیا کې وړیا ښوونیز مرکز څخه ٤٠ تنه زده کوونکي فارغ شول

د پکتیا ولایت د اطلاعاتو او کلتور ریاست د ځوانانو چارو آمریت له وړیا ښوونیز مرکز څخه ٤٠ تنه زده کوونکې د کمپیوټر له درې میاشتنیو زده کړو وروسته د یوې غونډې په ترڅ کې فارغ شول.
د اطلاعاتو او کلتور رئیس مولوي ثواب جان اسلام یار د یادې غونډې پرمهال وویل: اطلاعاتو او کلتور ریاست د ځوانانو چارو آمریت د ځوان نسل د علمي کچې لوړوالي او فکري روزنې په برخو کې ځوانانو لپاره د دیني او عصري زده کړو زمېنه برابره کړې، چې په مختلفو برخو کې وړیا زده کړې ورکول کېږي.
نوموړي زیاته کړه؛ د اسلامي نظام ساتنې او ټینګښت لپاره اړتیا ده، چې ځوانان د دیني او عصري زده کړو ترڅنګ د ټکنالوژۍ په برخه کې نوښتونه وکړي، تر څو نړیوالو سره سیال شو، هغه له ځوانانو وغوښتل، چې خپلو زده کړو ته نور هم دوام ورکړي او په خپلو وړتیاوو باندې کار وکړي.
فارغ شوو ځوانانو وویل: خوښ دي، چې د اطلاعاتو او کلتور ریاست لخوا ورته د کمپیوټر په برخه کې د وړیا زده کړو زمينه برابره شوې وه، دا زده کړې به دوی سره د دندو په پیدا کولو او پرمخ وړلو کې زیاته همکاري وکړي، خو غوښتنه کوي، چې د نظري زده کړو ترڅنګ دې د عملي زده کړو زمينه هم برابره شي.
د اطلاعاتو او کلتور ریاست مسؤلین وايي: د زده کړو دغه لړۍ به په راتلوونکي کې هم دوام ولري او پلان لري، چې د ژمنیو رخصتیو پرمهال د ځوانانو لپاره د تېر په څېر بېلابېلو برخو کې د وړیا زده کړو ټولګي فعال کړي.

۱۴۴۶/۵/۱۹ هـ ق
۱۴۰۳/۹/۱ هـ ل