بدخشان کې د امارت پېژندنې سيالۍ غوره ګډونوال وستايل شول
د بدخشان ولایت د اطلاعاتو او کلتور ریاست د ځوانانو چارو آمریت د امارت پېژندنې کتاب کې له درې سوه ځوانانو ازموینه اخیستې وه، چې پایلې یې اعلان شوې او غوره ګډونوال د جایزو په ورکولو وستایل شول.
د اطلاعاتو او کلتور رئیس انجینر ذبیحالله امیري وویل: د دې سيالۍ موخه دا وه، چې ځوانان د اسلامي امارت له نظام سره بلدتیا ومومي او له نظام سره یې اړیکې ټینګې شي.
نوموړي زیاته کړه؛ د دغسې سیالیو ترسره کول د ځوانانو په منځ کې د هېواد د ابادۍ او پرمختګ په برخه کې د فعالې ونډې اخیستو فکر پراخوي.
ښاغلي اميري له ځوانانو وغوښتل، چې له شته فرصتونو ګټه واخلي او د هېواد په آبادۍ کې رغنده رول ولوبوي.
د ځوانانو په استازولۍ نبيالله احمدي هم په دې غونډه کې خبرې وکړې او په هېواد کې د اقتصادي او ټولنیزو ستونزو د هواري لپاره یې د هڅو پر اهمیت ټینګار وکړ، هغه وویل: د نن ورځې نسل باید د نظام د پیاوړتیا او ثبات د ټینګښت لپاره هڅه وکړي، نوموړي د دا ډول سياليو ترسره کول د ځوانانو د وړتیاوو د لوړولو لپاره مهم ګام وباله.
یاده دې وي، چې د اطلاعاتو او کلتور ریاست له خوا د دې ازموینې شل غوره ګډونوالو ته نقدي او معنوي جایزې او تقدیرنامې هم ورکړل شوې.
۱۴۴۶/۵/۱۸ هـ ق
۱۴۰۳/۸/۳۰ هـ ل
