(څنګه لیکوال شم؟) تر عنوان لاندې علمي سیمینار وړاندې شو
د اطلاعاتو او فرهنګ وزارت د عامه کتابتونونو ریاست له لوري د (څنګه لیکوال شم؟) تر عنوان لاندې د د یاد ریاست په تالار کې لسګونو تنو لیکوالانو، زده کړیالانو او زده کوونکو ته علمي سیمینار وړاندې شو.
له سیمینار څخه موخه د لیکوالانو، زده کړیالانو او زده کوونکو د لیکوالۍ له اصولو او مهارتونو سره بلدتیا، د لیکوالۍ وړتیاوې او ادبي خلاقیت پیاوړي کول، د یو بریالي لیکوال کېدو پړاوونه پیژندل او د لیکلو اثارو د تولید او خپرولو لپاره عملي لارې چارې وړاندې کول وو.
د سيمينار په پیل کې د عامه کتابتونونو رئیس دوکتور رفیع الله صمیم وویل: د عامه کتابتونونو ریاست هڅه کوي، چې د لیکوالانو او ځوانانو د علمي ظرفیت د لوړولو لپاره ورته علمي سیمینارونه جوړ کړي. نوموړي له ځوانانو او د مطالعې له مینه والو څخه وغوښتل چې د عامه کتابتون له علمي سرچینو څخه ګټه واخلي او خپلې مشورې د کتابتون د چارو د ښه والي لپاره شریکې کړي.
وروسته د هېواد مشهور لیکوال او د سیمینار وړاندې کوونکي قاري عبدالستار سعید، د لیکوالۍ د اهمیت، د قلم ارزښت او د مطالعې د رول په اړه له ګډونوالو سره ګټور معلومات شریک کړل، همدارنګه د سیمینار د وړاندې کوونکي له لوري د لیکوالۍ د پړاوونو، د املا او انشاء د اصولو او د یادښت اخیستلو د طریقو په اړه لازمې څرګندونې وشوې او ګډونوال د لیکلو د مهارتونو د پیاوړتیا له لارو چارو سره بلد شول.
۱۴۴۸/۱/۸ هـ ق
