په برګمټال ولسوالۍ کې د امارت پيژندنې علمي سیالۍ پايلې اعلان شوې
د نورستان ولايت د اطلاعاتو او کلتور رياست د ځوانانو چارو امريت له لوري برګمټال ولسوالۍ کې د امارت پېژندنې کتاب علمي سیالۍ ترسره شوې وه، چې د یوې غونډې په ترڅ کې يې پايلې اعلان او غوره ګډونوال په بېلابېلو ډاليو ونازول شول.
په یاده غونډه کې د اطلاعاتو او کلتور رياست رئيس مولوي سميع الحق حق بيان، د برګمټال ولسوال مولوي غلام قادر حيدري، د پوهنې امر او یو شمیر ادارو مسؤلینو او زده کوونکو ګډون کړي وو.
د اطلاعاتو او کلتور رئيس مولوي سميع الحق حق بيان وویل: د ځوانانو او زده کوونکو د علمي وړتيا لوړونې، فکري ودې، د امارت په تمامه معنا پيژندل، سالم رقابت او مطالعې ته د هڅونې په پار يې دا سيالۍ ترتيب کړې وه.
د برګمټال ولسوال مولوي غلام قادر حيدري د اطلاعات او کلتور ریاست له مسؤلینو مننه وکړه، چې داسې سیالۍ جوړوي، دې ډول سیالیو سره ځوانان حق او باطل پیژني، فکر يې وده کوي او کتاب لوستنې سره يې ليوالتيا زياتيږي.
د يادونې ده، چې د سیالۍ لومړي مقام ګټونکي ته يو پايه کمپیوټر، دويم مقام ګټونکي ته ځيرک مبايل او همدا راز تر لسم مقام ګټونکو پورې مختلفې ډالۍ ورکړل شوې.
۱۴۴۶/۳/۱ هـ ق
۱۴۰۳/۶/۱۴ هـ ل
