د ځوانانو چارو معین خوست کې «د ځوانانو د روښانه راتلونکي لپاره فرصتونه» سیمینار کې ګډون وکړ
نن پنجشنبه (۱۴۴۵/۱/۱۰هـ ق) د اطلاعاتو او کلتور وزارت د ځوانانو چارو معین ښاغلي قاري محمدیونس راشد خوست ولایت ته د خپل رسمي سفر په ترڅ کې «د ځوانانو روښانه راتلونکي لپاره فرصتونه» تر عنوان لاندي سیمینار چې د یاد وزارت د ځوانانو چارو معینیت لخوا د خوست د اطلاعاتو او کلتور ریاست د غونډو په تالار کې جوړ شوی ؤ، ګډون وکړ.
په یاد سیمینار کې د خوست د اطلاعاتو او کلتور رئیس الحاج شبير احمد عثماني، فرهنګیانو، د دولتي او خصوصي پوهنتونونو محصلینو او ګڼ شمېر مسؤلینو ګډون درلود.
په پیل کې د خوست د اطلاعاتو او کلتور رئیس ښاغلي عثماني د ځوانانو چارو له معین څخه مننه وکړه چې خوست ته راغلی او د ځوانانو مشکلات او ستونزي له نږدي اوري.
وروسته د ځوانانو چارو معین قاري محمدیونس راشد صاحب په خپلو خبرو کې ځوانانو ته وویل، تاسو د هیواد د ملا تیر یاست، خپله ځوانه انرژي مو په کار واچوئ، څو هیواد د پردیو له احتیاجه وباسئ.
د سیمینار په وروستۍ برخه کې د ځوانانو چارو معین صاحب او ځوانانو ترمنځ ازاد بحث او مناظره ترسره شوه، چې پکې ځوانانو قناعت بخښونکي ځوابونه تر لاسه کړل او همدا راز ورسره د دوی د شته مشکلاتو د حل ژمنه وشوه.
