پنجشېر کې سلګونو خبریالانو او فرهنګي فعالانو ته د فکري، عقیدوي او مسلکي ظرفیت لوړونې سیمینار وړاندې شو
د اطلاعاتو او فرهنګ وزارت د خپرونو چارو میعنیت له لوري د پنجشېر اطلاعاتو او فرهنګ ریاست په همکارۍ سلګونو خبریالانو، مطبوعاتي مسؤلینو، ادیبانو، قلموالو مبارزینو او ځوانانو ته د (فکري، عقیدوي او مسلکي ظرفیت لوړونې) په نوم یو ورځنی روزنیز سیمینار وړاندې شو، چې په دغه سیمینار کې د اطلاعاتو او فرهنګ وزارت د خپرونو چارو معین ښاغلي مهاجر فراهي، د پنجشېر مرستیال والي ملا شاه ملنګ روح الله، د یاد وزارت یو شمېر رئیسانو، د سیمهئیزو ادارو مسؤلینو او د پوهنتون استادانو هم ګډون کړی و.
په دغه سیمینار کې د خپرونو چارو معین مولوي مهاجر فراهي د رسنیو مهم رول ته په اشارې له خبریالانو څخه وغوښتل چې د منفي تبلیغاتو په وړاندې ودریږي او د ملي وحدت پیاوړتیا، د اسلامي نظام د استحکام، او د اسلامي نظام د لاسته راوړنو د رسنیزو کولو په برخه کې فعاله ونډه واخلي او همدارنګه یې د عالیقدر امیرالمؤمنین (حفظه الله) د فرامینو په خپراوي او پلي کیدو ټینګار وکړ.
ښاغلي مهاجر زیاته کړه، چې په اقتصادي برخو کې د لاسته راوړنو تر څنګ، لومړي ځل لپاره له افغان خاورې څخه پلان شوي هوایي عملیات د پاکستان په داخل کې په خواریجو او د شر او فساد پر مرکزونو ترسره شول، چې دا د هېواد د دفاعي ځواکونو د پیاوړتیا څرګندونه کوي.
دغه راز د اطلاعاتو او فرهنګ وزارت د عامو اړيکو رئيس او ویاند قاري خبیب غفران په تاریخ کې د خبريالانو د راپورونو او ليکنو ثبت ته په اشارې، د پېښو د رسنیز کولو او د ټولنې د خبرولو په برخه کې د رسنیو په دروند مسؤلیت ټینګار وکړ، ښاغلي غفران د پنجشير سیمه یزو رسنيو د فعاليتونو ستاینه وکړه او له خبريالانو څخه یې وغوښتل چې د کره او مستندو خبرو په خپرولو سره له بې اساسه خبرو څخه او تفرقې مخنيوی وکړي او په ملي وحدت او د اسلامي ارزښتونو په ساتنه کې فعال او مسؤولانه رول ولوبوي.
ورته مهال د پنجشېر د اطلاعاتو او فرهنګ ریاست د اطلاعاتو آمر د دغه سيمينار او نورو روزنيزو پروګرامونو جوړول د خبريالانو په علمي او مسلکي ظرفیت لوړولو کې او د رسنيو او فرهنګي بنسټونو تر منځ د تعامل په پیاوړتيا کې اغیزمن وبلله.
همدارنګه د خپرونو چارو معینیت سلاکار مولوي عبدالحق حماد، د کابل پوهنتون استاد دوکتور شفیق وردګ، د پنجشير د مقام دفتر رئیس مولوی عبدالمتین عزام او نورو ويناوالو هم د اسلامي نظام په ملاتړ، ملي اهدافو په تحقق، له تعصباتو سره مبارزه او د افغانستان اسلامي امارت د لاسته راوړنو په رسنیز کولو کې د رسنیو رول مهم وباله او ټينګار يې وکړ، چې رسنيز بنسټونه باید په دې برخه کې مسؤولانه او جدي چلند وکړي.
ویناوالو همدارنګه د هېواد په پرمختګ کې د ځوانانو رول باندې ټینګار وکړ او ځوانان یې د پوهې حاصلولو، فردي مهارتونو پیاوړتیا، اخلاقي ارزښتونو ته ژمنتیا، صداقت او ټولنې ته د خدمت کولو لپاره وهڅول.
د سیمینار په پای کې ګډونوالو د یاد سیمینار له جوړولو څخه خوښي څرګنده کړه او د خبریالانو مسلکي ظرفیت لوړونې، د ځوانانو ظرفیت لوړونې او د فرهنګي فعالیتونو پیاوړتیا لپاره یې د ورته نورو پروګرامونو د جوړولو غوښتونکي شول.
