فاریاب او پروان ولایتونو کې د رسنیو له مسوولینو سره د همغږۍ غونډې ترسره شوې
د فاریاب او پروان ولایتونو د اطلاعاتو او فرهنګ ریاستونو له لوري په جلا جلا توګه له خبریالانو، د امارتي او خصوصي رسنیو د مسوولینو او د امارتي ادارو له ویاندویانو سره د همغږۍ غونډې ترسره شوې.
اطلاعاتو او فرهنګ ریاستونو مسوولینو د رسنیزو بنسټونو او امارتي ادارو ترمنځ د همغږۍ پر اهمیت ټینګار وکړ او د معلوماتو په رسولو، عامه پوهاوي او د ټولنې د واقعیتونو په انعکاس کې یې د رسنیو رول مهم وباله.
همدارنګه په دغو غونډو کې د افغان خبریالانو د خوندیتوب کمېټې مسوولینو د خبریالانو پر وړاندې د شته ستونزو او ننګونو په اړه خبرې وکړې او د اطلاعاتو او فرهنګ ریاستونو له مسوولینو څخه یې وغوښتل چې د رسنیو کارکوونکو ملاتړ، همکارۍ او ستونزو د حل په برخه کې لا زیاتې همکارۍ وکړي. مسؤلینو د افغان خبریالانو خوندیتوب کمېټې د فعالیتونو( اقتصادي مرستې، د ظرفیت لوړونې پروګرامونو، د همغږۍ غونډې او د خبریالانو د ملاتړ) په اړه هم معلومات وړاندې کړل.
د غونډو نورو ګډونوالو هم د همکارۍ پر دوام، د همغږۍ پر پیاوړتیا او د رسنیزو فعالیتونو لپاره د ښه چاپېریال پر رامنځته کولو ټینګار وکړ.
۱۴۴۷/۱۱/۱۸ هـ ق
