نیمروز کې د لرغونو آثارو د قاچاق مخنیوی وشو
د نیمروز ولایت د زرنج_دلارام لويې لارې د شهرا کنډک د زیارکښو مجاهدینو له لوري د لسګونه قلمه لرغونو آثارو د قاچاق مخنیوی وشو.
د نیمروز ولایت د اطلاعاتو او کلتور رئیس مفتي حبیب الله الهام له امنیتي ځواکونو څخه د مننې ترڅنګ وویل: ۴۸ قلمه تاریخي آثار چې د بېلابېلو تاریخي دورو پورې تړاو لري، د شهرا کنډک د امنیتي منسوبینو له لوري له کشف او ضبط کولو وروسته د اطلاعات او کلتور ریاست اړوند محلي موزیم ته وسپارل شول.
ښاغلي الهام زیاته کړه؛ د تاریخي او فرهنګي آثارو له غصب، تخریب، پیر، پلور او قاچاق د مخنیوي په تړاو د عالیقدر امیرالمؤمنین حفظه الله فرمان په ښه توګه پلي کیږي، په دې برخه کې د ولایت په کچه د امنیتي مسؤولینو له لوري همکاري او همغږي شتون لري او هیچاته اجازه نه ورکول کیږي، چې تاریخي آثار قاچاق او یا تاریخي سیمي او آبدات تخریب کړي.
۱۴۴۷/۵/۲۶ هـ ق
