د امارتي ادارو د وياندويانو، خبریالانو او يوناما دفتر مسؤلینو ترمنځ ګډه ناسته وشوه
د لغمان ولایت د اطلاعاتو او کلتور رياست له لوري په ختيځ کې د يوناما دفتر په مالي همکارۍ د ملکي او نظامي ادارو ویاندویانو، خبریالانو، رسنیو مسؤلینو او ولسوالانو سره د لا غوره همغږۍ په موخه ناسته وشوه.
د اطلاعاتو او کلتور رئیس مولوي عبدالنور رسولي وویل: لغمان کې له خبریالانو او د رسنیو مسؤلینو سره ښه همغږي موجوده ده، اطلاعاتو ته لاس رسی اسانه دی او د خبریالانو د ستونزو د اوریدو په موخه میاشتنۍ ناستې ترسره کیږي.
په ختيځ کې د یوناما دفتر مسولې میرمن کرن لي کوټس په لغمان کې د اطلاعاتو او کلتور رياست، رسنيو او د امارتي ادارو د وياندويانو ترمنځ د ښې همغږۍ او همکارۍ د ستاينې ترڅنګ، د خبریالانو لپاره د لا زياتو اسانتياوو، د امارتي ادارو او رسنیو ترمنځ د لا ښو اړیکو جوړولو او بېلابېلو برخو کې د همکارۍ غوښتنه وکړه.
ورته مهال د لغمان ولايت مقام دفتر رئیس شکرالله کاوون ډاډ ورکړ، چې دغه ولایت کې د خبریالانو لپاره هر ډول سهولتونه برابر دي، ولایت مقام د دوی هرې ستونزې ته پر وخت رسېدګي کوي او اطلاعاتو ته د لاس رسي په برخه کې یې ورته لازمې اسانتیاوې برابرې کړي دي.
د ناستې په پای کې د ګډونوالو ترمنځ د خبریالانو لخوا له ولسوالانو او د هغوی له دفتر سره د اړیکو جوړولو پر لارو چارو، د روغتیا، پوهنې او اقتصاد په برخه کې د عامه پوهاوي کچې لوړولو او یوشمېر نورو موضوعاتو ازاد بحث ترسره شو.
۱۴۴۷/۵/۲۱ هـ ق
