د خصوصي خپرندویانو او کتاب پلورنځیو د ستونزو د ارزونې او حل کمېټې ناسته ترسره شوه
د اطلاعاتو او کلتور وزارت د قرآن کریم لیکلو او بیهقي کتاب خپرولو ریاست د رئیس مولوي عبدالعلیم ځانواک مفتي زاده په مشرۍ د خصوصي خپرندویانو او کتاب پلورنځیو د ستونزو د ارزونې او حل کمېټې ناسته ترسره شوه.
د دغې ناستې څخه موخه د عالیقدر امیرالمؤمنین حفظه الله تعالی د ۲۲۷/۱۹ ګڼې حکم د پلي کېدو څرنګوالی او عملي تطبیق و.
په پیل کې د خصوصي خپرندویانو او کتاب پلورنځیو استازو د مشرتابه مقام له پاملرنې او مهربانۍ او د اطلاعاتو او کلتور وزارت له دوامداره ملاتړ څخه مننه وکړه او ویې ویل، چې د قرآن کریم لیکلو او بیهقي کتاب خپرولو ریاست سره په همغږۍ او همکارۍ د اسلامي امارت د مشرتابه له خوا د خصوصي خپرندویانو او کتاب پلورنځیو لپاره نوي جوړ شوي مرکز کې لوی مطالعوي مرکز او د تالیف او ژباړې ګډه کمېټه جوړوي.
د دغې کمېټې استازو زیاته کړه، چې دغه نوښت به د اسلامي نظام د فکري بنسټونو د پیاوړتیا او د مسلمه اُمت د پوهاوي د لوړوالي په برخه کې یو له مهمو علمي خدمتونو څخه وي.
۱/۲/۱۴۴۷ هـ.ق
