د پنجشېر د اطلاعاتو او کلتور ریاست د موزیم نړېواله ورځ ولمانځله
د پنجشېر ولايت د اطلاعاتو او کلتور رياست مسؤلینو د موزيم نړيواله ورځ د يو لړ مراسمو په ترڅ کې ولمانځله.
په دې اړه جوړه شوې غونډه کې د اطلاعاتو او کلتور ریاست مسؤلینو ترڅنګ د یو شمېر امارتي ادارو استازو، فرهنګپالانو او ځوانانو ګډون کړی وو.
د اطلاعاتو او کلتور رئیس مولوي نصرالله ملکزاده د موزیم د نړېوالې ورځې په اړه د معلوماتو شريکولو تر څنګ د تاریخي او فرهنګي آثارو په ساتنې او خونديتوب ټینګار وکړ او ويې ویل: موزیم د ملي هویت په ساتنه او راتلونکو نسلونو ته د فرهنګي میراثونو په لېږد کې حیاتي رول لري، دا مهال د دې ولایت محلي موزیم کې لسګونه تاریخي آثار موجود دي.
همدا راز ښاغلي ملکزاده د دې ریاست له لوري د تاریخي او فرهنګي آثارو د پېژندنې او ساتنې په برخه کې د ترسره کړو هڅو په اړه هم معلومات وړاندې کړل او زیاته یې کړه؛ چې د فرهنګي او تاریخي ارزښتونو په اړه د پوهاوي د لوړولو په موخه ګڼ پروګرامونه تر کار لاندې دي.
۱۴۴۶/۱۱/۲۲ هـ ق
