د اطلاعاتو او کلتور وزیر د جاپان له سفیر سره وکتل
نن سهشنبه (۲۶ شعبان ۱۴۴۶) د اطلاعاتو او کلتور وزیر الحاج ملا خیرالله خیرخواه په خپل کاري دفتر کې د جاپان له سفیر تاکایوشي کورومایا سره په داسې حال کې ولیدل چې د هنر او فرهنګ معین مولوي عتیق الله عزیزي هم شتون درلود.
په پیل کې ښاغلي کورومایا د هغو پروژو په اړه معلومات شریک کړل چې جاپان یې په افغانستان کې فعالیت ترسره کوي.
هغه د افغانستان لپاره د جاپان د شپږ میلیونه ډالرو مرستې په اړه معلومات ورکړل، چې دوه ورځې وړاندې د یو ان اچ سي آر (د ملګرو ملتونو د پناه ورکوونکې ادارې) د بې ځایه شویو کورنیو او بېرته راستنېدونکو کډوالو لپاره لاسلیک شوي وو؛ هغه همدارنګه زیاته کړه چې دا مرستې د زیانمن شویو برخو د جوړولو لپاره دي.
ښاغلي کورومایا د هغه شپږ کسیز پلاوي چې د ملي موزیم رئیس هم شتون پکې درلود، په اړه راپور وړاندې کړ چې څو ورځې مخکې د ساساکاوا بنسټ په رسمي بلنه جاپان ته تللي وو، چې یاد پلاوي د فرهنګي میراثونو د څېړنې انستیتیوت او د توکیو د میراثونو فرهنګي ادارې څخه لیدنه کړې وه، نوموړي هیله څرګنده کړه چې دا سفر به د فرهنګي میراثونو په برخه کې د لا پرمختګ لامل شي.
ورپسې د اطلاعاتو او کلتور وزیر الحاج ملا خیرالله خیرخواه دوی ته تر ښه راغلاست ويلو وروسته وویل د افغانستان او جاپان اړیکې په تاریخي توګه مثبتې دي چې د صداقت او باور پر بنسټ جوړې شوې دي، او د هغه پلاوي سفر چې تازه جاپان ته تللی وو، د دواړو هېوادونو ترمنځ یې د فرهنګي اړیکو د پراختیا پیل وګڼلو، خیرخواه صاحب د جاپان له خوا د فرهنګي میراثونو د ساتنې په همکارۍ ټینګار وکړ او د جاپان هېواد علاقه یې په دې برخه کې مهمه وبلله.
همدارنګه د اطلاعاتو او کلتور وزارت د هنر او فرهنګ معین مولوي عتیق الله عزیزی په خپلو خبرو کې د فرهنګي میراثونو په اړه د ښوونیزو پروګرامونو او سیمینارونو د جوړولو په اړه یادونه وکړه او د دغه ډول پروګرامونو جوړول یې د تاریخي آبداتو په اړه د خلکو د عامه پوهاوي لپاره مهم وګڼل؛ ښاغلي عزیزي د ملي موزیم، بالاحصار او منار جام په اړه خبرې وکړې او له جاپان څخه یې د دې تاریخي ځایونو د بیارغونې پر اړتیا ټینګار وکړ.
په پای کې دواړو لوریو د فرهنګي اړیکو د پیاوړتیا او پراختیا په برخه کي ټینګار وکړ.
۲۰۲۵/۲/۲۵ ز
۱۴۰۳/۱۲/۷ هـ. ل
