د اطلاعاتو او کلتور رئیس د ځوانانو له ښوونیز مرکز څخه لیدنه وکړه
د کندوز ولايت د اطلاعاتو او کلتور ریاست رئیس مولوي ګل محمد الیاس او د ځوانانو چارو آمر قاري داد محمد منصور د یاد ریاست د ځوانانو ښونیز مرکز له زده کړییز بهیر څخه لیدنه وکړه.
ښاغلي الیاس په دې کتنه کې د ځوانانو له زده کړییز بهیر د څارنې ترڅنګ ددغه مرکز شته ستونزې واوریدې او د حل لپاره یې امکاناتو ته په کتو ډاډ ورکړ.
د یادونې وړ ده چې اوسمهال د اطلاعاتو او کلتور ریاست اړوند د ځوانانو په ښوونیز مرکز کې لسګونه ځوانان په کمپیوټر او انګلیسي برخو کې په زده کړو بوخت دي.
همدا راز د ليدنو په ترڅ کې د اطلاعاتو او کلتور رئيس د امارتي شرکت له چاپخونې څخه هم لیدنه ترسره کړه.
نوموړي د یادې چاپخونې ماشینونه له نږدې وليدل او مسؤلینو ته یې سپارښتنه وکړه، چې د چاپ په برخه کې دې د تل په څېر پاملرنه وکړي.
د چاپخونې آمر احمد جاوید واحدي د اطلاعاتو او کلتور رئیس ته د ښه راغلاست ترڅنګ وویل: چې د رنګه چاپ په برخه کې د یو ماشین پېرلو لپاره له همکارو مؤسسو سره خبرې وکړي، ترڅو په دې برخه کې له شته ستونزې هم له منځه ولاړې شي.
ښاغلي الیاس د یادې چاپخونې شته ستونزې واوریدې او ژمنه یې وکړه، چې یادې ستونزې به د ولایت مقام او اړوندو مرستندويه مؤسسو سره شریک کړي، څو د چاپخونې دغه برخه هم فعاله شي.
۱۴۴۶/۵/۱۸ هـ ق
۱۴۰۳/۸/۳۰ هـ ل
