سرپل کې د رسنيو له مسؤلينو او خبريالانو سره د همږغۍ غونډه وشوه
د سرپل ولایت د اطلاعاتو او کلتور ریاست په نوښت د دغه ولایت د مرستيال والي ملا محمد نادر حقجو په مشرۍ د دولتي او سیمه ییزو رسنیو له خبریالانو او استازو سره د همږغۍ یوه غونډه ترسره شوه، چې موخه یې په دولتي ادارو او سیمه ییزو رسنیو کې د خپرونو د کیفیت ښه والی وو.
په دې غونډه کې ملا محمد نادر حقجو ټینګار وکړ، چې خپرونو ته باید بشپړه پاملرنه وشي، تر څو خپاره شوي مطالب د اسلامي امارت له پالیسۍ او د هېواد له ملي ګټو سره په ټکر کې نه وي.
د اطلاعاتو او کلتور رئیس ملا عبدالغفار حقنما د خبریالۍ د دقیق او مسلکي راپور ورکولو پر ارزښت خبرې وکړې او زیاته یې کړه؛ چې د راپورونو چمتو کول باید د اسلامي امارت اصولو ته په پام سره وشي، نوموړي همدا راز له خبریالانو او مطبوعاتي مسوولینو وغوښتل، چې په خبر رسونه کې د امانتدارۍ او بې پلوۍ اصول مراعت کړي.
همدارنګه د دولتي ادارو ویاندویانو خپل نظریات او وړاندیزونه شریک کړل او پر متقابلې همکارۍ یې ټینګار وکړ، ترڅو ناسم او غلط معلومات خپاره نه شي.
د غونډې په پای کې ګډونوالو ژمنه وکړه، چې د خلکو لپاره به په شفاف، دقیق او لوړ کیفیت سره د خبر رسونې په برخه کې لا ډېرې هڅې وکړي.
۱۴۴۶/۵/۱۲ هـ ق
۱۴۰۳/۸/۲۴ هـ ل
