په کندز ولایت کې د تخارستان تاریخي مسجد د برنډو د بیارغونې چارې پیلېږي

د کندز ولايت د اطلاعاتو او کلتور رئيس مولوي ګل محمد الياس او د هنر او ګرځندوی آمر احمد جاويد رنجبر د تخارستان له تاريخي مسجد څخه ليدنه وکړه او هغه ساحې يې چې باید ورغول شي وارزولې.
د هنر او فرهنګ آمر احمد جاويد رنجبر وايي: د اطلاعاتو او کلتور وزارت د لرغونپوهنې رياست د لارښوونې له مخې په پام کې ده، چې د تخارستان د تاريخي مسجد د دوو برنډو د رغولو چارې پيل شي.
هغه زياته کړه: داطلاعاتو کلتور رياست مکلف دى، چې د لرغونو سيمو او تاريخي آبداتو ساتنه او پالنه وکړي، دغه مسجد سره له دې چې يوه تاريخي سيمه ده، يو مقدس ځاى هم دى.
د تخارستان د پروژې مشر سید هلال کمیل وايي: د اطلاعاتو او کلتور وزارت په لارښوونه او د کندوز ولايت د اطلاعاتو او کلتور رياست تر څارنې لاندې به ډېر ژر د تخارستان د تاریخي مسجد د بیارغونې چارې پیل شي، ددې پروژې لګښت شاوخوا يو مليون افغانۍ دی او په داسې ډول به ورغول شي، چې ددې تاريخي آبدې اصل شکل به ورسره تغير نه شي.

۱۴۴۶/۴/۳ هـ ق
۱۴۰۳/۷/۱۵ هـ ل