د پروان ځایي موزیم په معیاري وسایلو سمبال شو
پنجشنبه ( ۵ د محرم الحرام ۱۴۴۶) د پروان ولایت د اطلاعاتو او کلتور ریاست اړوند ځایي موزیم چې شاؤخوا ۱۵۰ قلمه لرغوني آثار لري په معیاري ویترینونو سمبال شو.
د اطلاعاتو او کلتور رئيس مولوي شمس الرحمن صدیقي وایي: د پروان ځایي موزیم په کال ۱۳۹۲ هجري لمریز کې جوړ شوی، چې د آثارو لرغونتیا یې د اسلامي دورې څخه رانیولې تر ۲۰۰۰ کاله پورې رسېږي، د نوموړي په وینا؛ په پروان ولايت کې يې د تاريخي آثارو د خوندي ساتلو په موخه دا اقدام ترسره کړی دی، تر څو د شته تاريخي آثارو څخه په سمه توګه ساتنه وشي.
ښاغلی صدیقي وایي چې د اسلامي امارت په راتګ سره لرغوني آثارو او سیمو ته ځانګړی پام شوی دی او هڅه کوو ترڅو د لیدونکو جذب او د موزیم د لا سمبالتیا په موخه نور ګامونه هم پورته کړو.
د موزیم مدیر عبدالصبور صافی وایي: له دې وړاندې د یاد ځایي موزیم ځیني آثار د معیاري ویترینونو د نشتون له امله د ویجاړېدو له خطر سره مخ وو، چې د ویترینونو سره به خوندي شي، د یاد موزیم آثار چې بېلابېلو تاريخي دورو پورې اړه لري، یادو ویترینونو کې به د ساتنې او نندارې په موخه ځای پر ځای شي.
۱۴۰۳/۴/۲۱ هـ ل
۲۰۲۴/۷/۱۱ میلادي
