د چارو ادارې لوی رئیس د اطلاعاتو او فرهنګ وزارت له سرپرست او نوماند وزیر سره وکتل
د چارو ادارې لوی رئیس ډاکټر فضل محمود فضلي د اطلاعاتو او فرهنګ وزارت له سرپرست او نوماند وزیر طاهر زهیر سره په کتنه کې د دغه وزارت د رهبرۍ په اصلاحي برنامو بحث او خبرې وکړې.
ښاغلي زهیر په دغه وزارت کې د چارو د بهبود په موخه د خپلو لومړیتوبونو، ترتیب شویو اصلاحي برنامو او د هېواد فرهنګي مسایلو ته د پاملرنې په هکله معلومات وړاندې کړل.
د جمهوري ریاست د چارو ادارې لوی رئیس د ښاغلي زهیر د اصلاحي لیدلوري هرکلی وکړ وې ویل، د افغاني فرهنګ د بډاینې او د هېواد د فرهنګي میراثونو د ساتنې په موخه طرحو او برنامو ته پاملرنه د وخت اړتیا ده او ډاډ یې ورکړ چې د یادو طرحو د منظورۍ او تطبیق په برخه کې به د چارو اداره ورسره لازمه همکاري وکړي
