د کاپيسا د اطلاعاتو او کلتور رئيس د طنین اطلاعات راډيو څخه څارنه وکړه
تېره ورځ د کاپيسا ولايت د اطلاعاتو او کلتور رئيس مولوي کريم الله وثیق، چې د ملي راډيو تلويزيون آمر احمد شاه خادم يې هم ملتیا کوله، حصې اول کوهستانات ولسوالۍ ته د خپل سفر په ترڅ کې د طنين اطلاعات راډيو څخه څارنه وکړه.
د طنين اطلاعات راډيو مسؤل مدير افتخار عالم د اطلاعاتو او کلتور رئيس او ورسره مل پلاوي په راتګ خوښي څرګنده کړه او د راډيو په اړه يې معلومات شریک کړل، د نوموړي په وينا؛ ياده راډيو په ۱۰ ساعته خپرونو کې په پښتو، دري او پشه يي ژبو ۱۸ بېلابېلې خپرونې په ژوندۍ او ثبت بڼه خپروي.
د اطلاعاتو او کلتور رئيس مولوي کريم الله وثیق د خلکو د اذهانو په روښانولو کې د رسنيو او خبريالانو رول ارزښتمن وباله او رسنۍ او خبريالان يې د شريعت په چوکاټ کې د قوانينو په مراعت کولو مسؤل وبلل.
همدا راز ښاغلي وثيق وويل: د اطلاعاتو او کلتور رياست ددې تر څنګ چې د رسنيو په خپرونو د څارنې مسؤليت لري، له رسنيو ملاتړ کوي او په دې مکلف دی چې د رسنيو او خبريالانو ستونزو ته په کتو د مرسته کوونکو موسساتو او ټولنو توجه راجلب کړي.
۱۴۴۵/۸/۱۰ هـ ق
۱۴۰۲/۱۲/۱ هـ ل
