روزګان کې د فعاله ځوانانو او لیکوالانو سره د همغږۍ ناسته تر سره شوه
د روزګان ولایت د اطلاعات او کلتور د رئیس قاري اغاولي قریشي او فعاله ځوانانو او لیکوالانو تر منځ د همغږۍ ناسته وشوه.
په دغه ناسته کې په ټولنیزو رسنیو کي د خدمت پر ارزښت، لاس ته راوړنو او هغوۍ ته د ښه لیکوالۍ پر اصولو بحث وشو.
د مجلس په پیل کې قاري اغاولي قریشی د فعاله ځوانانو د برحقې مبارزې مننه وکړه او زیاته یې کړه چي دا مهال مطبوعاتي سنګر د فکري سمون لپاره ډېر مهم دی چي پر مټ یې د کفري نړۍ منفي تبلیغات او ذهني اشغال له منځه وړل کیږي.
نوموړی وویل دا چي نړۍ وال کوښښ کوي فکري جګړه مخ ته یوسي، لازمه ده چي په خپله مبارزه د هغوی شوم اهداف له منځه یوسو.
لیکوالانو وویل: زموږ دنده د اسلام، نظام او هیواد د ګټو ساتنه او د نظام په وړاندې د خلکو د پروپاګند مخنیوی او ځوابي مبارزه کول دي چي دغه مبارزه په کلک هوډ او پیاوړې ارادې سره مخته وړو.
همداراز یې یو شمېر هغه اصول چي باید د اسلام، هیواد او اسلامي نظام په وړاندي د منفي تبلیغاتو مخه ډب کړي، د مجلس د ګډونوالو سره شریک کړل شول او د دوی څخه یې غوښتنه وکړه چي پر همدغو اصولو او مکرراتو باید خپله مبارزه ګړندۍ وساتو.
۱۴۴۵/۶/۲۹ ھ ق
۱۴۰۲/۱۰/۲۱ ھ ش
