پروان کې ژمني ښوونیز کورسونه پیل شول

د پروان ولايت د اطلاعاتو او کلتور ریاست اړوند ښوونیز مرکز کې څه باندې ١٥٠ تنه زده کونکو ته د رياضي او انګلیسي ژبې  ژمني درې میاشتني ښوونیز کورسونه پیل شول.
د اطلاعاتو او کلتور رئيس مولوي شمس الرحمن صدیقي ټولو ځوانانو ته د ښه راغلاست ترڅنګ د علم پر ارزښت وغږېد او زیاته یې کړه چې د یاد ریاست ټول امکانات او شته وسايل د ځوانانو چوپړ کې دي، ځوانان دې د یادو امکاناتو څخه په ګټې اخیستنې خپلې وړتیاوې لوړې کړي.   
ښاغلي صدیقي زیاته کړه، ځوانان د یوې ټولنې شتمني ده او همدوی دي چې ټولنه کې بدلون راولي، نوموړي د ټولو عصري او دیني علومو زده کړه اړینه وبلله او د یوې ټولنې پرمختګ يې د علم او زده کړو وده او پراختیا پورې تړلی وباله.
د ځوانانو چارو آمر حمدالله دانش د یاد ښوونیز مرکز راتلونکو پلانونو په اړه معلومات ورکړل او زیاته یې کړه؛ چې یاد ښوونیز مرکز کې به نزدې راتلونکي کې  د کمپیوتر او خطاطۍ کورسونه هم پیل شي. 
د یادونې وړ ده، چې تر دې دمه له یاد ښوونیز مرکز څخه سلګونه تنه زده کوونکي فارغ شوي دي او لسګونو تنو نورو ته په وړیا ډول پکې د زده کړو زمینه برابره شوې ده.
۱۴۴۵/۶/۲۰ هـ ق
۱۴۰۲/۱۰/۱۲ هـ ش